د لغمان د مرافعه محکمې رئیس د یاد ولایت له عمومي زندان څخه لیدنه وکړه
د لغمان ولایت د مرافعه محکمې عمومي رئیس محترم الحاج مولوي عبدالکریم (حقاني) او ورسره مل پلاوي په ۲۱/ ۲/ ۱۴۴۶ هـ ق نېټه د لغمان ولایت له عمومي زندان څخه لیدنه وکړه.
په دې لیدنه کې د مرافعه محکمې رئيس د بندیانو حالت له نږدې وکاته، د هغوی ستونزې يې واوریدې او د زندان مسؤولینو ته يې د يادو ستونزو د حل په موخه لازم هدایات وکړل.
د لیدنې په دوام یاد پلاوي د بندیانو د دوسیو په اړه معلومات تر لاسه کړل؛ ترڅو په زندان کې بېبرخلیکه کسان پاتې نشي.
دغه راز یاد پلاوي له هغو زندانیانو سره جلا، جلا وکتل چې د خپل برخلیک په اړه یې اندېښنه درلوده، هغوی ته یې ډاډ ورکړ او ورته وویل، ستاسو دوسیو ته به د شریعت د اصولو په رڼا کې رسېدنه کېږي.
د ليدنې په وروستيو کې د مرافعه محکمې رئیس د زندان مسؤولینو ته وویل، را سپارل شوې دندې زموږ دنیوي او اخروي مسؤولیت دی، چې باید په صداقت او ایماندارۍ يې ترسره کړو، په ځانګړې توګه د بندیانو پر وړاندې چې دوی د انساني کرامت خاوندان دي، خدای مکړه د دوی په چارو کې د ناغېړۍ له امله الله تعالی له موږ څخه ناراضه نشي.
