محترم مولوي بهاوالحق د پکتيکا د ښاري ابتدائيه محکمې د نوي رئيس په توګه معرفي شو
د پکتیکا ولایت د ښاري ابتدائیه محکمې لپاره نوی ټاکل شوی رئیس محترم مولوي بهاوالحق په ۱۲/ ۱/ ۱۴۴۶ هـ ق نېټه د یادې محکمې قضاتو او اداري کارکوونکو ته د یوې غونډې په ترڅ کې ور وپېژندل شو.
په دې غونډه کې د مرافعه محکمې عمومي رئیس محترم مولوي محبوب الرحمن (نقشبندي)، د ښاري محکمې مخکني رئیس مولوي محمد اشرف (ابوخالد)، د یادې محکمې قضاتو او اداري کارکوونکو ګډون کړی و.
د غونډې په پیل کې د ښاري محکمې مخکني رئیس وینا وکړه، نوي رئیس ته یې د یادې محکمې د قضاتو او اداري کارکوونکو ستاینه وکړه او په کارونو کې د اخلاص، صداقت او همکارۍ په اړه ډاډ او اطمینان ورکړ.
ورپسې د مرافعه محکمې عمومي رئیس د ښاري محکمې نوي رئیس ته ښه راغلاست ووايه، د پخواني رئیس د کارونو ستاینه یې وکړه وويل، مسؤولیت ته باید د غنیمت په سترګه ونه کتل شي او نه ورته غنیمت وویل شي، هر مسؤول باید په پوره ډاډ، صداقت او امانتدارۍ سره خپل ورسپارل شوی مسؤولیت ترسره کړي.
نوموړي زیاته کړه قضاء یو دروند مسؤولیت او عبادت دی، د قضاء د مسؤولیت ترسره کولو پر مهال باید ټول مصروفیتونه او کارونه پرېښودل شي، خپل قضائي کارونه په اخلاص او صداقت ترسره شي.
د مرافعه محکمې رئيس وويل، امارت د الله (جل جلاله) لوی احسان دی، چې ملت ته يې ور په برخه کړی دی، د دغه نعمت باید شکر ادا شي.
د غونډې په وروستيو کې د ښاري محکمې نوي رئیس ته د بریا او کاميابۍ دعا وشوه او غونډه پای ته ورسېده.
