د هلمند ولایت د محاکمو (۲۴) قضائي منسوبینو ته دوه میاشتنی روزنیز سیمینار پای ته ورسېد

د هلمند ولایت د ابتدائیه او مرافعه محاکمو اړوند (۲۴) تنو قاضیانو، مفتیانو، محررینو او د وثایقو آمر ته د قضائي او مسلکي ظرفیت لوړولو په موخه دوه میاشتنی روزنیز سیمینار، په ۲۰/ ۳/ ۱۴۴۸ هـ ق نېټه پای ته ورسېد.
یاد سیمینار د سترې محکمې د جنوب لوېدیځ زون قضائي معاونیت له خوا او د جنوب لوېدیځ زون د قضائي زده کړو ریاست په مدیریت او د عالیقدر امیرالمؤمنین (حفظه‌الله تعالی) د سپارښتنې سره سم، د کندهار په ابراهیم النخعي (رحمه‌الله) جامعې کې ترسره شو.
 د دې روزنيز سيمينار د پای په غونډه کې د سترې محکمې د جنوب لوېديځ زون قضائي مرستيال الحاج شيخ نور الله (منير)، د ابراهيم النخعي رحمه‌الله د جامعې رئيس استاد قاضي عبدالصادق (غزنوي)، د جنوب لوېدیځ زون تمیز عالي مقام د مدني، جزا، امنیت عامه، نظامي منسوبینو د دېوانونو رئيسانو او د یادې جامعې استادانو، مالي او اداري مرستیال مفتي محمد (نقشبندي) د تخصصاتو رئیس مفتي سیدمیر (ثاقب) او فاضلانو ګډون درلود.
په دغه روزنیز سيمينار کې ګډونوالو ته د قضائي چارو اړوند فقهي، جزائي، حقوقي او مسلکي موضوعات تدریس شول او د قضائي اصولو او مقرراتو د سم تطبیق، د دعوو د ارزونې، د قضائي پرېکړو د اصولو او ډولونو، د محاکمو د چارو د تنظیم او د شرعي احکامو د عملي کولو په اړه لازم معلومات وړاندې شول.
د پای په مراسمو کې د ابراهیم النخعي رحمه‌الله جامعې رئیس، د سترې محکمې د جنوب لوېدیځ زون قضائي مرستیال او د مرکزي دارالافتاء رئیس د عدالت، قضاوت او د قضائي مسئولیتونو پر اهمیت خبرې وکړې.
ویناوالو ټینګار وکړ، چې قاضیان باید د خلکو د قضایاوو د حل او فصل پر مهال عدالت، دقت، تقوا او انصاف په پام کې ونیسي او د شخصي اغېزو، واسطو، مقام او ټولنیز موقف پر ځای شرعي اصول او حق د پرېکړې معیار وګرځوي.
همداراز د محاکمو د اجراآتو اړوند مقرراتو، طرزالعملونو او د قضائي چارو د لا ښه تنظیم پر اړتیا خبرې وشوې او له ګډونوالو وغوښتل شول، چې ترلاسه کړي علمي او مسلکي معلومات په خپلو اړوندو دندو کې په عملي توګه وکاروي.
یاده غونډه د سترې محکمې د جنوب لوېدیځ زون د تمیز اړوند د مدني دېوان رئیس شیخ‌ امان‌الله له خوا د دعاء په ویلو پای ته ورسېده.
د یادونې وړ ده، چې د دغه سیمینار اساسي موخه د هلمند ولایت د محاکمو د قضائي منسوبینو د علمي او مسلکي ظرفیت لوړول او د قضائي چارو د لا ښه تنظیم او د خلکو د حقوقو د خوندي کولو په برخه کې د هغوی د مسئولیت احساس پیاوړی کول وو.