د سترې محکمې اړوند د جنوب لوېديځ زون قضائي مرستیال د بادغيس ولایت له محاکمو او امارتي ادارو څخه لیدنه وکړه
د سترې محکمې اړوند د جنوب لوېديځ زون قضائي مرستیال محترم شیخ نور الله (منیر) صاحب، د نظامي معاونیت د قضائي غړو مولوي محمد هاشم (الهام) او مفتي فضل الله عاصم، د قضائي تفتيش عمومي ریاست غړو شیخ محمد لعل او مولوي عطاء الرحمن، د جنوب لوېديځ زون د تميز عالي ریاست د تجارتي دېوان مفتي مولوي مغفورالله او یو شمېر نورو غړو په ملتیا، د خپلو ولایتي سفرونو په دوام د ۱۴۴۷هـ ق کال د ذوالقعدة الحرام میاشتې په ۲۶، ۲۷ او ۲۸مه نېټه د بادغيس ولایت د مرافعه، ښاري ابتدائیه، نظامي او اختصاصي محاکمو ترڅنګ د وثایقو او حقوقو له آمریتونو څخه لیدنه وکړه.
محترم شیخ نور الله (منیر) صاحب او ورسره مل پلاوي د یاد سفر په پیل کې د بادغيس ولایت له قضائي، اداري، خدماتي او نظامي مسؤولینو او منسوبینو سره وکتل او د قضائي چارو د لا ښه تنظیم، د اجراآتو د چټکتیا، شفافیت، حساب ورکونې او همغږۍ د تقویې په موخه یې لازمې سپارښتنې او ارزښتناک هدایات ورته وکړل.
د سترې محکمې د جنوب لوېديځ زون قضائي مرستیال د خپلو خبرو پر مهال ټینګار وکړ، چې د عدالت تأمین د اسلامي نظام له مهمو مسؤولیتونو څخه دی او ټول قضائي مسؤولین باید د شرعي احکامو، نافذه اصولو او اسلامي امارت د سپېڅلو ارزښتونو په چوکاټ کې ولس ته په پوره اخلاص، امانتدارۍ، تقوا او عدالت خدمت وکړي.
محترم شیخ منیر صاحب زیاته کړه، د مراجعینو دوسیې او ستونزې باید په جدي پاملرنې او بشپړ دقت وڅېړل شي او د شرعي او قانوني اسنادو تر بشپړې ارزونې وروسته دې فیصلې پر وخت ترسره شي، څو د ولس اعتماد لا پیاوړی او د خلکو حقوق په ښه ډول خوندي شي.
محترم شيخ منیر صاحب وویل، د اسلامي نظام قضائي ارګانونه د عدالت مهمه مرجع ده او د ولس خدمت، د مظلوم لاسنیوی او د حق تأمین هغه ستر مسؤولیتونه دي چې باید په رښتینولۍ او لوړ احساس یې ترسره کړي.
دغه راز محترم شیخ صاحب او ورسره مل پلاوي د بادغيس ولایت د مرافعه، ښاري ابتدائیه، نظامي او اختصاصي محاکمو له ریاستونو، دېوانونو او اړوندو ادارو څخه جلا جلا لیدنې وکړې، د هغوی روان اجراآت، اداري بهیرونه، د اسنادو د تنظیم څرنګوالی او د خدمتونو وضعیت یې له نږدې وڅېړه او د چارو د لا ښه والي لپاره یې ورته لازمې لارښوونې وکړې.
همدارنګه د سترې محکمې د جنوب لوېديځ زون د قضائي مرستیال په مشرۍ یاد پلاوي د خپل سفر په دوام د بادغيس ولایت له محترم والي، امنیه قوماندان، د علماء شورا او ستخباراتو له رئیسانو او یو شمېر نورو امارتي له مسؤولینو سره هم جلا جلا لیدنې وکړې او د محاکمو او نورو امارتي ادارو ترمنځ یې د لا قوي همغږۍ، متقابل تفاهم او ګډو همکاریو پر پیاوړتیا ټینګار وکړ.
د بادغيس محترم والي، د علماء شورا او نورو امارتي ادارو مسؤولینو د سترې محکمې د دغه پلاوي د سفر تود هرکلی وکړ او دا سفر یې د قضائي او اداري چارو د لا پیاوړتیا لپاره مهم وباله.
هغوی ډاډ څرګند کړ، چې د ولس د ستونزو د حل، د عدالت د تأمین، د شرعي نظام د پیاوړتیا او غوره خدمتونو وړاندې کولو په برخه کې به خپلو نه ستړې کېدونکو هڅو ته دوام ورکوي او له قضائي ارګانونو سره به هر اړخیزه همکاري کوي.
