د پکتیا ولايت مرافعه محکمې رئيس د یاد ولایت پنځو ولسوالیو له ابتدائیه محاکمو څخه لیدنه وکړه
د پکتیا ولایت مرافعه محکمې عمومي رئیس محترم الحاج مفتي عبیدالله (خالد)، د مرافعې محکمې د مدني دېوان رئیس مفتي عبدالله (دیوبندي)، د وثایقو ثبت او مخزن آمر سیدالرحمن (سعید) او د مرافعه محکمې د نظامي قطعې قوماندان محمد ایوب (طارق)، د ۱۴۴۷ هـ ق کال د جمادی الأولی میاشتې په ۱۰مه او ۱۱مه نېټه، د یاد ولايت د پنځو ولسواليو جانيخېلو، ډڼډ پټان، څمکني، لژه منګل او لژه احمد خېلو له ابتدائیه محاکمو څخه ليدنه وکړه.
د ليدنې په پیل کې د مرافعه محکمې رئیس د یادو محاکمو له قاضي صاحبانو او د ولسواليو له ولسوالانو، امنيه قوماندانانو او د استخباراتو مدیریت له مدیرانو سره د همغږۍ ناستې وکړې.
په دې ناستو کې د مرافعه محکمې رئیس د دوسیو د تطبیق او د خلکو د احضار په برخو کې له یو بل سره پر همکارۍ ټینګار وکړ او زیاته يې کړه چې د کارونو د پرمختګ او لا ښه سمون په موخه دې له یو بل سره وخت پر وخت د همغږۍ غونډې وشي، تر څو د هېوادوالو ستونزې پر خپل وخت حل او فصل شي.
د مرافعه محکمې یاد پلاوي د ليدنو په دوام، د یادو محاکمو د قضائي، حقوقي او جزائي دوسیو قرارونه، په اداري برخه کې صادره او وارده اسنادونه، د حاضرۍ، د عرايضو د ثبت، حقوقي او جزائي اندراجونو او شهریه څخه لیدنه وکړه.
د ليدنې په وروستيو کې د مرافعه محکمې رئيس مسؤولينو ته د چارو د لا ښهوالي او د بندیانو دوسیو د ژر څېړلو په برخه کې لازمې سپارښتنې او لارښوونې وکړې.
