د سترې محکمې د قضائي تفتیش عمومي ریاست مفتشینو د فارياب له مرکزي زندان او محاکمو لیدنه وکړه
د سترې محکمې د محترم مقام په هدایت د قضائي پلټنې د عمومي ریاست یوه پلاوي چې مولوي سيف الرحمن (ذاکر)، مولوي عبدالوارث (سعيد) او مولوي عبدالله (ذکي) یې غړیتوب درلود، د روان ۱۴۴۵ هـ ق کال د ربیع الاول میاشتې په ۲۲مه نېټه د فارياب ولایت د محاکمو د تېرو فعالیتونو د څېړنو په موخه یاد ولایت ته سفر وکړ.
دغه پلاوي د سفر په پیل کې د فارياب ولایت د مرافعه محکمې له محترم رئیس سره وکتل، ورپسې يې د بندیانو د ستونزو د څېړلو په موخه د فارياب ولایت له مرکزي زندان څخه لیدنه وکړه، د یاد زندان اړوند ټولو نارینه او ښځینه بندیانو بشپړ شهرت، کیفیت او نظریات يې له ځان سره وليکل او بیا يې د اړوند محاکمو له مسؤولینو سره پرې خبرې وکړې.
د سترې محکمې د عالي مقام لخوا ټاکل شوي پلاوي د خپل کاري پلان له مخې د یاد ولایت د (۱۷) ولسوالیو له ابتدائیه محاکمو، ښاري محکمې او مرافعه محکمې اړوند دېوانونو ، وثایقو او حقوقو آمریت څخه په جلا، جلا ډول لیدنې وکړې.
نوموړي پلاوي د څارنې بهیر په ترڅ کې د یادو محاکمو د قضائي، اداري او مالي چارو هر اړخیزه پلټنه ترسره کړه، د محاکمو د قضائي او اداري کارکوونکو د سلوکي او مسلکي اړخونو معلومات يې واخیستل او د چارو د سمون په برخه کې یې ورته لازمې لارښوونې وکړې.
ياد پلاوي د محاکمو اړوند ضروریاتو او مهم موارد له ځان سره وليکل او د ليدنې په وروستيو کې يې د ضروریاتو د رفعه کولو، د خنډونو د له منځه وړلو او د نېمګړتیاوو د اکمال په اړه د فارياب ولایت د مرافعه محکمې د ریاست له مقام سره تفاهمي ناسته وکړه او ټول موارد یې په جلا، جلا توګه ورسره شريک کړل.
د ياد سفر په دوام د سترې محکمې قضائي پلاوي د ولسوالیو له مسؤولینو، د فارياب ولايت استخباراتو رياست او امنيه قوماندان سره ناستې وکړې، د محاکمو د فعالیتونو د لا ښه پرمختګ او د ځينو اړوند ستونزو د حل په برخه کې یې د هغوی نظرونه واورېدل او د محاکمو په وړاندې شته ستونزې او د خلکو شکایتونه یې په دقیق او هر اړخیزه توګه وڅېړل.
د قضائي تفتیش د څارنې او پلټنې پلاوي له لاسته راوړنو ډک (۲۴) ورځنی سفر د ۱۴۴۵ هـ ق کال د ربیع الثاني میاشتې په ۱۶مه نېټه پای ته ورسېد.
