په کونړ ولايت کې درېيو متهمینو ته تعزیري سزا ورکړل شوه
د کونړ ولايت مرافعه محکمې د پرېکړې له مخې درېیو کسانو ته د لواطت په تور؛ نن دوشنبې ۲۲/ ۷/ ۱۴۴۷هـ ق نېټه تعزیري سزا ورکړل شوه.
مرافعه محکمې یاد کسان پر درې کاله تنفيذي بند او ۳۹ـ ۳۹ دُرو تعزیري سزا محکوم کړي وو؛ چې یاده پرېکړه د سترې محکمې عالي مقام له تائيد وروسته پر متهمینو تطبیق شوه.
په دې موخه جوړه شوې غونډه د قرآنکریم د څو مبارکو آیاتونو په تلاوت پیل شوه؛ ورپسې د مرافعه محکمې رئيس محترم الحاج مولوي عبدالکریم (شعیب) وینا وکړه وویل، که ټولنه کې حدود او تعزیرات تطبیق شي، نو موږ به د الله (جل جلاله) د رحمت مستحق وګرځو.
د غونډې په دوام د ناړۍ ولسوالۍ ابتدائيه محکمې رئيس مولوي سخي محمد او د یادې ولسوالۍ ولسوال شیخ امین الله (شهاب) هم د موضوع اړوند ویناوې وکړې.
غونډه د ښاري ابتدائیه محکمې د رئیس مولوي ظاهر الله (مروان) لخوا د دعاء په ویلو پای ته ورسېده.
