د کابل د مرافعه محکمې عمومي رئيس د ياد ولايت د ۴ ولسوالیو له ابتدائیه محاکمو او نظارت خانو څخه ليدنه وکړه
د روان ۱۴۴۵هـ ق کال د رجب المرجب مياشتې په ۱۲مه نېټه د کابل ولایت د مرافعه محکمې عمومي رئیس محترم مفتي ذبېح الله (ساجد) او د تحريراتو عمومي مدير عنایت الرحمن (صافي) د کابل ولایت د شکردرې، ګلدرې، فرزې او استالف ولسوالیو له ابتدائیه محاکمو څخه د یادو محاکمو د قضائي او اداري چارو د څارنې په موخه لیدنه وکړه.
د ليدنې په پيل کې ياد پلاوي د هرې محکمې دوه، دوه دوسيې او د يادو محاکمو اړوند د حقوقو مدیریتونو ټول اداري کتابونه وکتل، ياد پلاوي د لیدنې پر مهال په دې محاکمو کې د اجرا شویو او تر کار لاندې دوسیو ارقام له ځان سره یاداشت کړل.
محترم مفتي ساجد د یادو محاکمو مسؤولینو ته هدایت وکړ، چې دوسیو ته د رسېدنې پر مهال د نوبت مراعتول په جدي توګه په پام کې ونیسئ.
د يادې ليدنې په وروستيو کې محترم ساجد د شکردرې د قضائي غړو په ملتيا د یادو ولسوالیو عمومي نظارت خانو ته ورغلل، د نظارت لاندې کسانو د ساتنې ځایونه یې له نږدې وکتل، د یادو کسانو ستونزې یې واورېدې، هغوی ته یې د اسانتیاوو برابرولو په موخه ځینې لارښوونې وکړې او محاکمو ته یې هدایت وکړ چې د نظارت لاندې کسانو دوسیو ته باید په چټکۍ سره رسېدنه وشي.
