د قضائیه قوې د محاکمو امنیتي او اجرائیوي چارو عمومي ریاست د نظامي محاکمو د امنیتي او اجرائیوي عمومي قوماندانۍ لپاره رئیس ارکان معرفي شو
د روان ۱۴۴۵هـ ق کال د ربیع الثاني میاشتې په ۲۵مه نېټه د قضائیه قوې د محاکمو د امنیتي او اجرائیوي چارو عمومي ریاست د غونډو په تالار کې د یاد ریاست د نظامي محاکمو امنیتي او اجرائیوي عمومي قوماندانۍ لپاره ټاکل شوی رئیس ارکان محترم حافظ سید حکمت الله آغا (ذهین) د ياد عمومي رياست اړوند مسؤولینو او منسوبینو ته ور وپېژندل شو او رسماً یې دنده پیل کړه.
په دې غونډه کې د قضائیه قوې د محاکمو امنیتي او اجرائیوي چارو عمومي رئیس محترم مولوي محمد عوض (سعید)، د ملکي محاکمو امنیتي عمومي قوماندان مولوي عبدالله (عزام)، د حضرت عبدالله ابن مسعود (رضی الله عنه) د جګړه ایزو زده کړو تعليمي پوهنتون رئیس ارکان مولوي طالب، د حضرت ابو عبیده ابن جراح (رضی الله عنه) د ملي دفاع پوهنتون قوماندان مولوي محمد هاشم (حذیفه)، د رئیس ارکان مرستیال مفتي محمد اسلم (حقاني) او نورو مسؤولینو او منسوبینو ګډون درلود.
د غونډې په پيل کې د سترې محکمې د دعوت او ارشاد ریاست مدرس مولوي عبدالله جان وینا وکړه ویې ویل، اوس د ملت د هوساینې وخت را رسېدلی، مسؤول کسان باید د ملت د هوساینې لپاره کار وکړي ترڅو ملت هوسا او آرام شي.
نوموړي زیاته کړه، مسؤولیت یوه الهي آزموینه ده، په دغه الهي آزموینه کې د کامیابۍ لپاره باید هر مسؤولیت د الله تعالی د رضا په خاطر په ښه ډول ترسره شي.
ورپسې مولوي موسی د مسؤولینو پر اطاعت ټینګار وکړ، زياته يې کړه د مسؤولینو خبره اورېدل او اطاعت کول پرموږ لازم دي.
د يادې غونډې په دوام نوي ټاکل شوي رئیس ارکان سید حکمت الله آغا (ذهین) د غونډې ګډونوالو ته د خبرو پر مهال ډاډ ورکړ چې ورسپارل شوې دنده او مسؤولیت به په ښه ډول ترسره کوي او زیاته یې کړه: الحمدلله څښتن تعالی موږ ته له ډېرو قربانیو، ناخوالو وروسته دا اسلامي نظام راکړ، د دغه اسلامي نظام راتلل، دې حالت ته زموږ رسېدنه د الله تعالی په نصرت او د افغانستان د مجاهد، غیور ملت د قربانیو نتیجه ده.
نوموړي زیاته کړه اوس د الله (جل جلاله) څخه غواړم چې موږ ته توفیق راکړي تر څو د دغه ځورېدلي ولس لپاره خدمت وکړو، ان شاالله د ژوند تر وروستیو شېبو به د دغه اسلامي نظام او مجاهد ولس خدمت کوو.
ياده غونډه د قضائیه قوې د محاکمو د امنیتي او اجرائیوي چارو د عمومي رئیس محترم الحاج مولوي محمد عوض (سعید) صاحب په اختتامیه دعاء سره پای ته ورسېده.
