د سترې محکمې د قضائي تفتيش عمومي ریاست د ۱۴۴۷ هـ ق کال د دويمې ربعې لنډ راپور

د سترې محکمې د قضائي تفتيش عمومي ریاست د ۱۴۴۷ هـ ق کال په دويمه ربعه کې لاندې مهم فعاليتونه سرته رسولي دي:

1-    په دویمه ربعه کې د قضائي تفتيش عمومي رياست، د قضائي مفتشینو له لوري د روزګان، جوزجان، سرپل، کندوز، نیمروز، تخار، بلخ، ننګرهار او دایکنډي ولایتونو د محاکمو کړنې څېړل شوې او راپورونه یې د راتلونکو هدایتونو په موخه د سترې محکمې عالي مقام ته لېږل شوي دي.
2-    د قضائي تفتيش عمومي رياست، له اساسي دندو څخه، د سترې محکمې د عالي شورا د مصوباتو، مقرراتو، لوایحو او طرزالعملونو دوامداره نظارت دی، چې د مفتشینو له لوري د دویمې ربعې په جریان کې یاد نظارت ترسره شوی دی.
3-    په دویمه ربعه کې د قضائي تفتيش عمومي رياست، د قضائي مفتشینو لخوا ربعه‌وار او کلني راپورونه، چې د ولایتونو له محاکمو څخه راټول شوي وو، د عادي څېړنو پر مهال څېړل شوي، توپيرونه او علتونه يې تشخیص او اړوندو مسؤولینو ته يې په اړه لازمې لارښوونې شوې دي.
4-    په دویمه ربعه کې د قضائي تفتيش عمومي رياست، د قضائي مفتشینو له لوري د عادي او اقتضائي کړنو پر مهال د هغو قضائي او اداري مسؤولینو په اړه، چې زیات تخلفات یې درلودل، راپورونه ترتیب او د راتلونکو هدایتونو لپاره د سترې محکمې عالي مقام ته لېږل شوي دي.
5-    په دویمه ربعه کې د قضائي تفتيش عمومي رياست، قضائي مفتشینو له خوا د محاکمو د عادي څېړنو پر مهال یو شمېر قضائي، اداري او خدماتي مسؤولینو ته لارښوونې شوې، تر څو پر اسلامي امارت او محاکمو د خلکو باور لا زیات شي او مسؤولینو ته جدي او لازم هدایتونه شوي، چې د خلکو شکایتونو ته د اصولو سره سم او پر وخت رسېدنه وکړي.
6-    په دویمه ربعه کې د قضائي تفتيش عمومي رياست، ټولې (۱۸۱) اقتضایي عريضې ثبت کړې، چې له دې جملې (۱۴۰) عريضې څېړل شوې او (۴۱) نورې تر کار لاندې دي.
7-    په دویمه ربعه کې د قضائي تفتيش عمومي رياست له خوا د ولایتونو د محاکمو او محبسونو د عادي اجراآتو د څېړنې پر مهال د کندوز، تخار، غزني، جوزجان، سرپل او نیمروز ولایتونو محبسونه کتل شوي؛ د محبوسینو شکایتونه ثبت او ستونزې یې د وضاحت او حل په موخه له مرافعه محاکمو، ښاري محاکمو او نورو اړوندو مراجعو سره شریکې شوې دي.