په خوست ولايت کې اوو متهمينو ته تعزیري سزا ورکړل شوه
د خوست ولايت تڼیو او صبریو ولسوالیو ابتدائیه محاکمو د پرېکړو له مخې اوو کسانو ته د لواطت، قتل او غلا په تور او مجروحيت په جرم؛ په ۳/ ۱۲/ ۱۴۴۶ هـ ق نېټه تعزیري سزا ورکړل شوه.
ابتدائیه محاکمو یاد متهمين او مجرم له درېيو میاشتو تر لس کالو پر تنفيذي بند او له ۳۵ څخه تر ۳۹ دُرو پر تعزیري سزا محکوم کړي وو؛ چې یادې پرېکړې د سترې محکمې عالي مقام له تائيد وروسته پر متهمينو تطبيق شوې.
د تعزیري سزا د تطبیق په موخه جوړه شوې غونډه کې د مرافعه محکمې عمومي رئيس محترم الحاج مفتي امین الله (منیب)، د مرافعه محکمې د عامه امنيت دېوان مفتي اسدالله (حيدري)، د تحریراتو آمر مولوي عیدمحمد (حميدي)، عامو هېوادوالو او مسؤولینو ګډون درلود.
غونډه د قرآنکریم د څو مبارکو آیاتونو په تلاوت پیل شوه؛ ورپسې د مرافعه محکمې رئيس د تعزیراتو او حدودو پر ارزښت تفصیلي وینا وکړه وویل، دا څو کاله جهادي مبارزه قربانۍ او تکالیف په همدې خاطر وو چې اسلامي شریعت حاکم شي، د ځمکې پر مخ الهي قانون پلی شي، ځکه چې اسلامي شریعت د عقل، مال، نفس او نسب په ساتنه ټینګار کوي او د یادو شیانو تحفظ په حدودو او تعزیراتو کېږي.
دغه راز د عامه امنيت دېوان مفتي هم د تعزیراتو په اړه هر اړخيزې خبرې وکړې.
غونډه د تڼیو ولسوالۍ د مسجد امام لخوا د دعا په ویلو پای ته ورسېده.
