د کابل ولایت مرافعه محکمې رئیس په مشرۍ اداري غونډه وشوه
د کابل ولایت مرافعه محکمې عمومي رئیس محترم مفتي ذبیح الله (ساجد) په مشرۍ؛ د مرافعه محکمې دېوانونو رئیسانو په ګډون په ۲۳/ ۱۰/ ۱۴۴۶هـ ق نېټه د یادې محکمې مقام په دفتر کې اداري غونډه وشوه.
په دې غونډه کې د عالیقدر امیرالمؤمنین (حفظهالله تعالی) د نوي فرمان چې د مرافعه او ابتدائیه محاکمو اجراآتو په اړه په کې نوي هدایات شوي وو؛ د تطبیق په موخه بحث او خبرې وشوې.
د غونډې په دوام یاد پنځه ماده لرونکی فرمان تشرېح شو او مرافعه محکمې رئيس لخوا ځینې موارد په نښه شول، تر څو يې د تطبيق د لارو چارو په اړه د سترې محکمې له عالي مقام څخه لارښوونه ترلاسه کړي.
دغه راز د غونډې ګډونوالو ته د مرافعه محکمې رئيس حقوقي دوسیو کې د مرافعه او تمیز غوښتنې موانع په ګوته کړل او وویل، کله چې یاد موانع موجود وي، نو دوسیه مرافعه یا هم تمیز ته د لېږلو مخکې په دوسیه کې د موجوده ستونزو او موانعو په اړه دې مرافعه محکمې ته تفصيلي راپور ورکړل شي.
د غونډې په وروستيو کې د مرافعه محکمې رئيس لخوا د دېوانونو رئیسانو ته هدايت وشو، چې د ماتحت کارکوونکو حاضرۍ ته دې جدي پاملرنه وکړي.
غونډه د دعا په ویلو پای ته ورسېده.
