د لغمان د مرافعه محکمې رئیس د بادپښ له ابتدائیه محکمې لیدنه وکړه
د روان کال د محرم الحرم میاشتې په ۱۲مه نېټه د لغمان ولایت د مرافعه محکمې عمومي رئیس ښاغلي الحاج مولوي عبدالله (فرقاني) د لغمان ولایت بادپښ ولسوالۍ ته سفر وکړ.
د مرافعه محکمې د عمومي رئيس له دغه سفر څخه هدف د یادې ولسوالی د ابتدائیه محکمې له حاضرۍ او نورو ورځینو اجراآتو څخه له نږدې کتنه وه.
د مرافعه محکمې رئیس د یادې محکمې مسؤولینو ته په خطاب کې وویل، کوښښ وکړئ چې تل خپلو دندو ته پابند پاته شئ، له مراجعینو سره نېک او سم چلند وکړئ او د هغوی موضوعات په عادلانه ډول حل کړئ.
دغه راز محترم مولوي عبدالله (فرقاني) وویل، زه غواړم د ولایت په کچه د یوې محکمې دروازه هم د عام ولس پر مخ بنده پاتی نشي او د مراجعینو کارونه د اسلامي شریعت په رڼا کې حل او فصل شي.
د یادونې وړ ده چې د لغمان د مرافعه محکمې رئیس د ابتدائیه محاکمو د چارو د بررسۍ او مدیریت په موخه وخت پر وخت د ولسوالیو ابتدائیه او ښاري ابتدائیه محاکمو له چارو څخه له نږدې کتنه او بررسي کوي.
