شيخ مولوي قيام الدين قانت د کابل ولايت د مرافعه محکمې د دېوان تجارت د نوي رئيس په توګه رسماً معرفي شو
د ۱۴۴۴ کال د ذوالحجې د میاشتې په ۲۳مه، د کابل ولایت مرافعه محکمې عمومې ریاست د مقام په دفتر کې، د يوې جوړې شوې غونډې په ترڅ کې ښاغلی شيخ مولوي قيام الدين قانت صاحب د کابل د مرافعه محکمې د دېوان تجارت د رئيس په توګه د ياد رياست کارمندانو ته معرفي شو، چې د معرفت په دې غونډه کې د سترې محکمې د نظامي محاکمو مرستیال ښاغلي شیخ مولوي خیرجان خیرخواه، د کابل د مرافعه محکمې عمومي رئيس ښاغلي مولوي عبدالشکور "رشاد آخندزاده "، د دېوان تجارت پخواني رئيس ښاغلي مولوي عبدالله "اسرار" او نورو مفتي صاحبانو ګډون کړی وو.
غونډه د قرآن کریم د څو مبارکو آیاتو په لوستلو سره پیل شوه، وروسته ښاغلي شیخ خیرخواه صاحب د غونډې ګډونوالو ته په خطاب کې وویل : دا چې الحمدلله مسلمانان یو او الله پاک خپل مبارک کتاب کې ذکر کړي چې د الله او د الله د رسول او د اولی الامر څخه اطاعت وکړئ، نو پر موږ واجب ده چې د امیر المؤمنین حفظه الله د فرمان څخه اطاعت وکړو.
ښاغلي شیخ صاحب زیاته کړه چې په اسلام کې وظایف په اصل کې یو مسئولیت دی نه حق، او مسئولیت د مشرانو لخوا سپارل کیږي او کله چې راکړل شو نو باید په ښه توګه يې ترسره کړو.
ورپسې ښاغلي مولوي رشاد آخندزاده صاحب، ښاغلي قانت صاحب ته په خطاب کې وویل چې الله تعالی دي درته توفق درکړي چې در سپارل شوې دنده او مسئولیتونه په ښه توګه ترسره کړې.
غونډه د دعائیې په لوستلو سره پای ته ورسېده.
