د لغمان ولايت د استيناف محکمې رياست د غونډو په تالار کې اداري غونډه ترسره شوه
د ۱۴۴۴ هـ ق کال د شوال المکرم د میاشتې په ۲۸مه نېټه د لغمان ولایت د مرافعه محکمې د غونډو په تالار کې اداري غونډه دائره شوه.
ياده غونډه چې د لغمان ولایت د مرافعه محکمې رئيس، د ښاري محکمې رئيس او د لغمان ولایت اړوند ولسوالیو د ابتدائیه محاکمو محترمو قاضيانو، مفتيانو او محررينو ګډون کړی وو، د کلام الله مجید په څو مبارکو آیاتونو سره پیل شوه.
ورپسې د غونډې رئیس ښاغلي مولوي عبدالله (فرقاني) ګډونوالو ته ښه راغلاست ووایه او د غونډې په اهمیت يې هر اړخیزه وینا وکړه، چې وروسته يې د غونډې ګډونوالو ته په لاندې موضوعاتو تأکید وکړ.
لومړی، دا کومې دوسیې چې د پورته محاکمو له خوا نقض شوي وي د هغو کړنو ته باید لومړیتوب ورکړل شي.
په دوهم پړاو کې هغه دوسیې چې د تاریخ له مخې محکمې ته مخکې راغلي وي باید ژر تر ژره حل او فصل شي.
درېیم دا چي هره دوسیه د هغه طرزالعمل مطابق لوړې محکمې ته واستول شي چې د سترې محکمې له خوا يې په متحد المآلونو کې ذکر شوی دی.
د غونډې په وروستۍ برخه کې ګډونوالو خپلې ستونزې واورولې چې د لغمان ولایت د مرافعه محکمې د رئیس له خوا ورته لازم هدایات ترسره شول.
غونډه د دعائيه په ويلو سره پای ته ورسیده.
