د لوګر د استیناف محکمې رئیس د برکي برک ولسوالۍ ابتدائیه محکمې ته د قضائي اجراآتو د ارزونې په موخه سفر وکړ
د لوګر ولایت د استیناف محکمې رئیس محترم مولوي روح الله عبدالسلام او د لوګر ولایت د استیناف محکمې د مدني دېوان رئیس محترم مولوي اکبرجان سعید په ۲۹/ ۷ / ۱۴۴۴ هــ ق نېټه د دغه ولایت د برکي برک ولسوالۍ له ابتدائیه محکمې څخه لیدنه وکړه.
د استیناف محکمې رئیس برکي برک ابتدائیه محکمې ته له رسېدو وروسته د حاضرۍ، اندراج، واردې او صادرې او رسیداتو کتابونه وکتل او مسؤولینو ته یې په يادو کتابونو کې د شته نیمګړتیاوو د سمون لارښوونه وکړه .
ورپسې یې د یادې محکمې د قضائي اجراآتو (فیصلو، قرارونو او وثیقو) ځینې نمونې مطالعه کړې او په یادو برخو کې د لا دقت او شفافیت په موخه یې د ابتدائیه محکمې مسؤولینو ته لارښوونې وکړې.
نوموړي د یادې محکمې مسؤولینو ته توصیه وکړه چې خپلو دندو ته دې پابند اوسي، په قضائي اجراآتو کې دې د کار د کمیت تر څنګ د کار کیفیت ته هم توجه وکړي او کارونه دې د یوه منظم پلان له مخې ترسره کړي؛ تر څو کاري وخت په سالمه توګه مدیریت او مثبته نتیجه ولري.
په پای کې د استیناف محکمې رئیس د برکي برک محکمې د مسؤولینو ستونزې او غوښتنې واورېدې او ژمنه یې وکړه چې د امکان تر حده به د دوی ستونزې حل او غوښتنو ته به يې رسېدنه ورکړي.
د یادو سفرونو عمده موخه د محاکمو له قضائي او اداري اجراآتو څخه لیدنه، د شته نیمګړتیاوو حل، قضات خپلو دندو ته متوجه کول او له مرکز سره د ولسوالیو د اړیکو تقویه ده.
