د قضائي تعلیماتو عمومي ریاست کې جوړ شوی قضائي سیمینار نن پای ته ورسېد
د افغانستان اسلامي امارت د سترې محکمې اړوند قضائي تعلیماتو ریاست کې جوړ شوی قضائي سیمینار چې د ۱۹ ولایتونو د اختصاصي محاکمو قضاتو او مفتي صاحبانو په کې ګډون کړی و، نن پای ته ورسېد.
په دغه قضائي سیمینار کې چې یوه اونۍ مخکې پیل شو د مسلکي استادانو او شیوخ کرامو لخوا ګډونوالو ته په عملي او نظري توګه د قضاء برخه کې روزنه ورکړل شوه.
د سیمینار په اختتامیه ناسته کې د سترې محکمې اداري معاون محترم شیخ عبدالمالک حقاني صاحب، د سترې محکمې قضائي معاون محترم شیخ محمد قاسم راسخ صاحب او نورو مسؤولینو خبرې وکړې.
د سترې محکمې اداري معاون محترم شیخ عبدالمالک حقاني صاحب وویل، دا ملت ډېر ځورول شوی دی او پر موږ یې حق دی چې په ښه توګه یې خدمت وکړو.
ښاغلي حقاني صاحب زیاته کړه، دا هیواد زموږ کار او ستړیاوو ته اړتیا لري او د رغونې لپاره یې بل څوک نشته چې کار وکړي، نو الله (جل جلاله) چې موږ ته کوم علوم او وړتیاوې راکړي دي باید ګټه یې نورو ته ورسوو.
د سترې محکمې اداري معاون دغه راز وویل، زموږ او ستاسو مسوؤلیت تر نورو زیات دی؛ ځکه د مشرتابه مقام لخوا ځانګړي صلاحیتونه او استقلالیت راکړل شوی دی، باید شپه او ورځ د دې ملت خدمت ته نه ستړي کیدونکی خدمت وکړو، ځکه دعوت کولای شو، د منکراتو مخنیوی کولای شو، د ظالم لاس نیولی شو او د مظلوم سره تعاون او همکاري کولای شو، نو باید دا ستړی ملت هوسا کړو او پر اسلامي امارت یې باور قوي کړو.
دغه راز د سترې محکمې قضائي مرستیال محترم شیخ محمد قاسم راسخ صاحب د سیمینار د اختتامیه ناستې ګډونوالو ته وویل، زه د خپل او د محترم قاضي القضات له لوري تاسو ته سلامونه وایم، د سترې محکمې محترم رئیس او قاضي القضات موږ ستاسو د حال د پوښتنې او تعارف لپاره راولېږلو.
محترم شیخ محمد قاسم راسخ صاحب زیاته کړه، اوس الحمدلله افغانستان کې ډېر پرمختګونه روان دي.
نوموړي وویل، د سیمینار هدف دا دی چې د قضاء اړوند مهم موارد درته وښودل شي او په راتلونکي کې ترې ګټوره استفاده وکړی.
یاده ناسته د دعاء په ویلو سره پای ته ورسېده.
