د قضائي تفتیش عمومي ریاست مفتشینو د ميدان وردګ ولايت له محاکمو او مرکزي زندان څخه لیدنه وکړه
د سترې محکمې د محترم مقام په هدایت د محترم مولوي سيد اسحاق (سادات) په مشرۍ د قضائي پلټنې يوه پلاوي چې مولوي روزي محمد (زميل) او مولوي اختر محمد (مظهري) یې غړيتوب درلود؛ د روان ۱۴۴۶هـ ق کال د شوال المکرم میاشتې په ۲۰مه نېټه د ميدان وردګ ولایت د محاکمو د تېرو فعالیتونو د څېړنو په موخه ياد ولايت ته سفر وکړ.
دغه پلاوي د سفر او ليدنې په پیل کې د ميدان وردګ ولايت د مرافعه محکمې رئیس سره وکتل؛ ورپسې يې د بندیانو ستونزو د څېړلو په موخه د یاد ولایت له مرکزي زندان څخه لیدنه وکړه، د زندان اړوند ټولو بندیانو بشپړ شهرت، کیفیت، شکایتونه، ستونزې يې له ځان سره وليکل او بیا يې له اړوند محاکمو سره شریک کړل.
د سترې محکمې عالي مقام لخوا ټاکل شوي پلاوي د خپل کاري پلان له مخې د میدان وردګ ولایت د (۸) ولسوالیو له ابتدائیه محاکمو، ښاري او مرافعه محاکمو اړوند دېوانونو، وثایقو آمریت، مخزن، حقوقو آمريت او اختصاصي محکمې څخه په جلا جلا ډول لیدنه وکړه.
دغه پلاوي د څارنې بهیر په ترڅ کې د یادو محاکمو له قضائي، اداري او مالي چارو هر اړخیزه پلټنه وکړه، د محاکمو د قضائي غړو او اداري کارکوونکو د سلوکي او مسلکي اړخونو معلومات يې واخیستل او د چارو د سمون په برخه کې یې ورته لازمې لارښوونې وکړې.
د قضائي تفتيش پلاوي د محاکمو اړوند شته ستونزې او کاري خنډونه له ځان سره وليکل او د ليدنې په وروستيو کې يې د ستونزو د حل، خنډونو د له منځه وړلو، د شته نېمګړتیاوو د اکمال په اړه د یاد ولایت د مرافعه محکمې له رئيس سره تفاهمي ناسته وکړه او ځينې ستونزې يې په جلا جلا توګه ورسره شريکې کړې.
دغه پلاوي د څارنې او ليدنې په دوام د یاد ولایت د ځينو مسؤولینو سره ناستې وکړې او د محاکمو د فعالیتونو د لا ښه پرمختګ او د ځينو اړوند ستونزو د حل په موخه يې د هغوی نظرونه واورېدل.
ياد پلاوي د میدان وردګ ولايت د محاکمو په وړاندې د شته ستونزو دقیقه او هر اړخیزه څېړنه وکړه.
د قضائي تفتیش د څارنې او پلټنې پلاوي ياد له لاسته راوړنو ډک سفر د ۱۴۴۶ هـ ق کال د ذوالقعدة الحرم میاشتې په لومړۍ نېټه پای ته ورسېد.
