د سترې محکمې د مرکزي تمیز عالي ریاست د رئیس په مشرۍ د دېوانونو د مسؤولینو ترمنځ اداري غونډه وشوه
د سترې محکمې د مرکزي تمیز عالي ریاست رئیس محترم شیخ محمد شریف «حقاني» په مشرۍ چې د پنځه ګونو دېوانونو رئیسانو په کې ګډون درلود، په ۱۱/شعبان المعظم/ 1446هـ ق د مرکزي تمیز عالي ریاست کې اداري غونډه وشوه.
یاده غونډه د قرآنکریم د څو مبارکو آیاتونو په تلاوت سره پیل شوه؛ ورپسې محترم محمد شریف «حقاني» د اسلامي شریعت د احکامو، د اسلامي امارت د اصولو او لوایحو د تطبیق، د مراجعینو دوسیو ته د رسېدنې بهیر د چټکتیا او نورو اړوند موضوعاتو په اړه تفصیلي خبرې وکړې.
د مرکزي تمیز عالي ریاست رئیس دغه ډول غونډې د چارو د چټکتیا، د مراجعینو دوسیو ته پر وخت د رسېدنې، د مرکزي تمیز عالي ریاست د پنځه ګونو دېوانونو مسؤولینو لخوا د تېرو او اوسنیو اجراآتو اړوند معلوماتو شریکولو او دغه راز د مراجعینو دوسیو ته د رسېدو بهیر د تقویې لپاره مهمې وبللې.
په دې سربېره د مرکزي تمیز عالي ریاست د پنځه ګونو دېوانونو رئیسانو او نورو ګډونوالو د غونډې اجنډا کې د شاملو موضوعاتو په اړه خبرې وکړې وویل، زموږ هڅه دا ده چې د محمدي شریعت د احکامو او د اسلامي امارت د محاکمو د اصولو په رڼا کې د مراجعینو ټولې قضیې په ټاکلي وخت حل او فصل کړو، ترڅو حق یې حقدار ته وسپارو.
دغه راز په غونډه کې د اجنډا اړوند موضوعاتو په اړه تر تفصیلي خبرو وروسته د مرکزي تمیز عالي ریاست اړوند دېوانونو مسؤولینو ته لازمې لارښوونې وشوې، ترڅو خپل اجراآت د تصویب شویو موضوعاتو مطابق عیار کړي.
غونډه د دعا په ویلو پای ته ورسېده.
