د کندوز زون د نظامي محاکمو امنیتي او اجرائیوي قوماندانۍ لپاره د نوي ټاکل شوي قوماندان د معرفت غونډه وشوه
د قضائيه قوې د محاکمو امنيتي او اجرائيوي چارو عمومي ریاست د نظامي محاکمو د امنیتي او اجرائیوي قطعاتو عمومي قوماندانۍ اړوند د کندوز اتم زون د نظامي محاکمو امنیتي او اجرائیوي قوماندانۍ لپاره نوی ټاکل شوی قوماندان قاري شفیع الله (مشفق) په ۶/ ۳/ ۱۴۴۶ هـ ق نېټه د يوې غونډې په ترڅ کې د يادې قوماندانۍ مسؤولینو او منسوبینو ته ور وپېژندل شو او رسماً یې خپله دنده پيل کړه.
په دې موخه جوړه شوې غونډه کې د نظامي محاکمو امنیتي او اجرائیوي قطعاتو عمومي قوماندان حافظ حکمت الله (آغا ذهین)، د پېژند عمومي مدیر مولوي نور محمد (قتیبه)، د اووم زون بلخ د نظامي محاکمو امنیتي او اجرائیوي قومندانۍ قوماندان قاري محمد الدین (شهاب)، د کندوز زون د نظامي محکمې رئیس شیخ صانح الله (برخمند) او يو شمېر نورو مسؤولینو او منسوبینو ګډون درلود.
یاده غونډه د قرآنکریم د څو مبارکو آیاتونو په تلاوت پیل شوه؛ ورپسې د نظامي محاکمو امنیتي او اجرائیوي قطعاتو عمومي قوماندان حافظ حکمت الله آغا ذهین وینا وکړه، نوي ټاکل شوي قوماندان ته يې د خپلو مسؤولیتونو د ښه ترسره کولو او نوښتونو د رامنځته کولو په برخه کې لازمې سپارښتنې وکړې او دوی ته يې د هر ډول همکارۍ ډاډ ورکړ.
غونډه د دعا په ویلو پای ته ورسېده.
