د سترې محکمې د جزا دېوان عمومي رئیس د بلخ او سرپل ولایتونو د والي صاحبانو په ګډون له ټولو ولایتي مسؤولینو سره وکتل
د سترې محکمې د رئیس او قاضي القضات محترم شیخ عبدالحکیم (حقاني) صاحب په ځانګړي هدایت د سترې محکمې د جزا دېوان د عمومي رئیس مفتي عتیق الله (دروېش) صاحب په مشرۍ یوه پلاوي بلخ او سرپل ولایتونو ته د سفر پر مهال د یادو ولایتونو د والي صاحبانو، د ټولو محاکمو، د علماوو شورا، د احکامو د تعقیب او نظارت او استخباراتو له رئیسانو، امنیه قوماندانانو، امربالمعروف نهی عن المنکر او شکایتونو د اورېدو او زندانونو له مسؤولینو، د حوزو له آمرینو، د امنیه قوماندانۍ د جنایي پېښو پروړاندې د مبارزې، د نشه یي توکو پر وړاندې د مبارزې او د تروریزم پر وړاندې د مبارزې له مدیرانو او یوشمېر نورو ولایتي مسؤولینو سره د همږغۍ په موخه ګډه ناستې ترسره کړه.
یادو غونډو ته چې د قرانکریم د مبارکو آیاتونو په تلاوت پیل شوې د سترې محکمې د جزا دېوان عمومي رئیس محترم مفتي عتیق الله (دروېش) صاحب په خپلو خبرونو کې وویل، د سترې محکمې د رئیس او قاضي القضات محترم شیخ عبدالحکیم (حقاني) صاحب په ځانګړي هدایت یې دغو ولایتونو ته سفر پیل کړی دی ترڅو له ولایتي مسؤولینو سره ناستې ترسره کړي، د ولایتي ادارو ترمنځ همغږۍ لا ډېره او ستونزو ته د ژر رسېدو په موخه حللارې رامنځته کړو.
د سترې محکمې د جزا دېوان عمومي رئیس زیاته کړه، والي صاحبان، د محاکمو رئیس صاحبان، امنیه قوماندانان، د امربالمعروف، نهی عن المنکر او شکایتونو د اورېدو مسؤولین، د علماوو شورا رئیس صاحبان او غړي او نورو ولایتي مسؤولینو سره د همغږۍ دغه غونډې ځکه ضروري دي چې دوی په ټولنه کې تر ټولو ډېر د ولس سره سر او کار لري، د ولس په حال او شکایتونو تر ټولو لومړی دوی خبرېږي.
محترم مفتي عتیق الله (دروېش) صاحب وویل، ټول امارتي مسؤولین مسؤولیت لري چې د دغه ځورېدلي ولس ستونزې حل کړي، له دوی سره ښه چلند وکړي او ولس په غوره او حسنه اخلاقو د اسلامي نظام لوري ته راوبولي.
پر دې سربېره محترم مفتي صاحب په اسلامي نظام کې د ټولو ادارو د همغږۍ او اصولي همکارۍ پر اړتیا خبرې وکړې وویل، د اسلامي نظام هره اداره خپل مسؤولیت لري چې مسؤولین یې باید په هڅه وکړي خپل مسؤولیت په غوره ډول ترسره کړي او د نورو ادارو په چارو کې مداخله ونکړي.
محترم مفتي دروېش صاحب د اسلامي نظام ادارې لکه د ځنځیر حلقې یادې کړې وویل، هره اداره د بلې ادارې همغږۍ او همکارۍ ته اړتیا لري، مثلا امنیتي مسؤولین مجرم نیسي، زندانونه یې ساتي؛ خو د شرعي فیصلې او سزا ورکولو صلاحیت یوازې محاکم لري.
د سترې محکمې د جزا دېوان رئیس د اسلامي نظام د محاکمو په اړه خپلو خبرو کې وویل، محاکم دي چې الهي احکام په ټولو تطبیق کوي، د ظالم لپاره سزا ټاکي، د مظلوم حق ورکوي او د مظلوم لاسنیوی کوي، د انسانانو او حتی د حیوانانو او نورو ژوندیو موجودانو حقوق ورکوي، د اشخاصو او افرادو د حقونو ساتنه کوي.
محترم مفتي دروېش صاحب له ولایتي مسؤولینو او عامو هیوادوالو غوښتنه وکړه چې پر خپلو مشرانو په ځانګړې توګه د محاکمو پر مسؤولینو باور ولري او زیاته یې کړه، ولایتي مسؤولین دې په خپلو منځو کې پوره همغږۍ ولري په دې سره به د جرایمو سطحه لا نوره هم ټیټه شي.
دغه راز د غونډو ټولو ګډونوالو د همغږۍ د تقویې په اړه خپلو نظرونه شریک کړل او د سترې محکمې له راغلي پلاوي څخه پر مننه یې ژمنه وکړه چې ټول به په پوره صداقت او ایماندارۍ د اسلامي نظام د حاکمیت، د ولس د خدمت او د جرایمو د مخنیوي برخه کې په بشپړه همغږۍ نه ستړې کېدونکې هلې ځلې کوي.
د یادونې وړ ده چې د سترې محکمې دغه پلاوی به د هیواد یو شمېر نورو شمالي ولایتونو ته هم سفر وکړي.
