له پاکستان څخه د راستنېدونکو افغان کډوالو په اړه د سترې محکمې اعلامیه

دا چې په دې وروستیو کې له پاکستان هیواد څخه ګڼ شمېر افغان کډوال هیواد ته راستانه شوي/ راستنېږي نو په دې اساس د افغانستان اسلامي امارت ستره محکمه ټولو راستانه شوو/ راستنېدونکو افغان کډوالو ته د هرکلي ترڅنګ دوی ته د هر ډول ممکنه مرستو او په خپل ګران هیواد افغانستان کې د امن او هوسا ژوند د شرایطو برابرولو ډاډ ورکوي.  
دغه راز د سترې محکمې محترم مشرتابه له ټولو امارتي ادارو، ملي تجارانو او عامو هیوادوالو غواړي چې په هره برخه کې هیواد ته د راستانه شوو/راستنېدونکو وروڼو او خویندو داسې هرکلی وکړي لکه د مدیني منورې انصارو چې د مکې مکرمې له مهاجرو وروڼو سره وکړ، تر خپل توان پورې یې هر ډول همکاري وکړي او دوی ته په خپل هیواد کې د زده کړو، کار او هوسا ژوند شرایط برابر کړي.
په درنښت
شیخ عبدالحکیم (حقاني)
د سترې محکمې رئیس او قاضي القضات