د روزګان د مرافعه محکمې رئيس د دهراود ولسوالۍ له ابتدائیه محکمې څخه ليدنه وکړه
په ۱۴/ ۹/ ۱۴۴۵هـ ق نېټه د روزګان ولایت د مرافعه محکمې رئیس محترم شیخ سخیداد (ابوالتقي)، د امنيت عامه دېوان رئیس شیخ مولوي رحیم الدین، مفتی خیر الله، مولوي امیرمحمد (ایوب)، اجرائیه مدیر محب الله نظري او د اسنادو، وثایقو د ثبت مامور مولوي محمد په ملتيا د دغه ولایت د دهراود ولسوالۍ له ابتدائیه محکمې څخه لیدنه وکړه.
په ياده ليدنه کې د روزګان ولایت د مرافعه محکمې رئیس د دهراود ولسوالۍ د ابتدائیه محکمې قاضي، مفتي او محرر ته د قضائي چارو د ښه ترسره کولو په برخه کې لازم هدایات وکړل وویل، د خلکو عرایضو ته په ټاکلي وخت رسېدنه وکړئ، د خلق الله کارونه په شفاف ډول په خپل وخت حل او فصل کړئ.
دغه راز يې قضائي غړيو ته جدي سپارښتنه وکړه چې د خلکو ستونزې او دعواوې د اسلامي اصولو او د محاکمو اصولو ته په کتو سره حل او فصل کړئ، هېڅ فشار په ځان مه منئ، د هېڅ فرد تر تاثیر لاندې مه راځئ او حق حقدار ته وسپارئ.
د ليدنې په وروستيو کې د مرافعه محکمې اجرائيه مدیر د ابتدائیه محکمې د اداري برخې ټول کتابونه، صادره او وارده، رسیدات، اندراج او د وثایقو کتابونه وکتل او د یادې برخې ټولو کارکوونکو ته يې لازمې لارښوونې وکړې.