د پکتیا د مرافعه محکمې د مسؤولینو په هڅو د دوو کورنيو ترمنځ د قتل موضوع حل شوه
د پکتیا ولایت مرافعه محکمې مسؤولینو په ۲۶/ ۱۲/ ۱۴۴۵ هـ ق نېټه د ډېرو هڅو په نتیجه کې د دوو کورنیو ترمنځ د قتل موضوع حل او فصل کړه.
د قتل دغه دوسیه لومړی د پکتیا ولایت د زرمت ولسوالۍ ابتدائيه محکمې ته راجع شوه؛ له ابتدائي اجراآتو وروسته د استينافي غور او څېړنې په موخه د مرافعه محکمې د جزا دېوان ته محول شوه.
د پکتیا ولایت د مرافعه محکمې د عمومي رئيس محترم الحاج مفتي عبیدالله (خالد) او د مرافعه محکمې د جزا دېوان د رئيس مولوي واحدالله (صدیقي) په ډېرو هڅو د دوسیې دواړه لوري سولې ته راضي شول او د زرمت ولسوالۍ د جهادي مشرانو، علماء کرامو او مخورو سپين ږیرو په منځګړيتوب د یادې ولسوالۍ د خندقه کلي د دوو کورنيو د قتل موضوع حل او د یادو کورنیو ترمنځ سوله وشوه.
