د پکتيا د مرافعه محکمې رئيس د مرافعه او ښاري ابتدائيه محاکمو د دېوانونو له رئيسانو سره ناسته وکړه

د پکتیا ولایت د مرافعه محکمې عمومي رئيس محترم الحاج مفتي عبیدالله (خالد) په ۵/ ۳/ ۱۴۴۶ هـ ق نېټه د  مرافعه او ښاري ابتدائيه محاکمو د دېوانونو له رئيسانو سره په خپل کاري دفتر کې وکتل.
د ناستې په پيل کې د مرافعه محکمې رئيس خبرې وکړې وويل، ورځنۍ قضائي او اداري چارې په اخلاص او د الله (جل جلاله) د رضا په خاطر ترسره کړئ.
نوموړي وویل، د قضاء او محاکمو چارې سختې او درندې دي؛ نو د محاکمو قضائي او اداري غړي دې هڅه وکړي چې ور سپارل شوي مسؤولینه په ښه ډول ترسره کړي او له مراجعینو سره دې اصولي چلند کوي.
نوموړي زیاته کړه، په ورین تندي په شرعي او اصولي ډول د مراجعینو ستونزو ته رسېدنه وکړئ.
د مرافعه محکمې رئيس زیاته کړه، د اسلامي امارت تر چتر لاندې د امراوو اطاعت پر تاسو لازم دی، د زړه له تله له خپلو امراوو سره مینه وکړئ، خپلې قضائي او اداري چارې د سترې محکمې د عالي مقام له اصولو، لوایحو، کړنلارو او قوانینو سره سم ترسره کړئ؛ ترڅو قضائي او اداري چارې پوره شفافې وي او د مشرانو اطاعت په کې شوی وي.
محترم مفتي خالد درنو قضاتو ته توصیه وکړه چې دوسیې اصولو ته په کتو سره ژر تر ژره فیصله کوئ، ترڅو خلک له ستونزو سره مخ نشي، دغه راز يې په جزائي او حقوقي دوسیو باندې مفصل بحث وکړ.
د ناستې په وروستيو کې د مرافعه او ښاري ابتدائيه محاکمو د دېوانونو رئيسانو هم خپل نظرونه د مجلس ګډونوالو ته وړاندې کړل او ناسته د دعاء په ویلو پای ته ورسېده.