د سترې محکمې د ۱۴۴۷هجري قمري کال د څلورمې ربعې د عمده فعالیتونو احصائیوي راپور

د افغانستان اسلامي امارت سترې محکمې د تمیز عالي ریاستونو او د ۳۴ ولایتونو محاکمو د ۱۴۴۷هـ ق کال په څلورمه ربعه کې، ټولټال (۷۱۶۲۵) قضیو ته رسېدنه کړې، چې له دې جملې څخه (۶۱۸۹۸) قضیو ته په ابتدائیه محاکمو کې، (۷۱۸۸) قضیو ته په مرافعه محاکمو او (۲۵۳۹)  قضیو ته په تمیز محکمه کې رسېدنه شوې ده.
همدارنګه، درې ګونو محاکمو په یاده موده کې د ښځو د میراث اړوند (۳۳۸۸) قضیو او د نشه‌یي توکو او مسکراتو اړوند (۴۵۶۵) قضیو ته رسېدنه کړې ده.
په دې سربېره، د ملک په محاکمو کې د څلورمې ربعې په ترڅ کې (۳۷۱۷۶) بېلابېلې شرعي او قانوني وثیقې اجراء شوې، چې د هېوادوالو لپاره د حقوقي خدمتونو د پراختیا او د آسانتیاوو د رامنځته کېدو څرګندونه کوي.
د قضائي خدمتونو د لا ښه تنظیم او د هېوادوالو د غوښتنو د پر وخت تعقیب په موخه، د سترې محکمې د عالي مقام د تحریراتو ریاست او د قضائي معاونیت له لوري د مراجعینو (۴۴۱۳) عرایضو ته رسېدنه شوې ده.
همدارنګه، په همدې موده کې د دارالانشاء عمومي ریاست له لوري د (۱۱۸۹) بېلابېلو عرایضو، استهداآتو او نورو اداري موضوعاتو اړوند اجراآت ترسره شوي، د قضائي مسؤولینو په ترغیبي هڅو او د علماء کرامو، سپین‌ږیرو او قومي مخورو په منځگړیتوب د قتل د (۱۲۰) قضیو په اړه د شرعي احکامو له مخې د دیت، صلح، جوړجاړي او ابراء پر بنسټ حکمونه صادر شوي دي.
باید وویل شي چې، ستره محکمه د اسلامي امارت د قضائي نظام د اساسي موخو په رڼا کې ژمنه ده، تر څو د اسلامي شریعت د سپېڅلو احکامو پر بنسټ د خلکو حقوق خوندي کړي، قضیو ته پر وخت، عادلانه او شفافه توگه رسېدنه وکړي او د هېوادوالو لپاره د باوري، اغېزمنو او معیاري قضائي او اداري خدمتونو د وړاندې کولو هڅې نورې هم قوي کړي.