د کندهار زون نظامي محکمې او د یاد ولايت د امنيتي ادارو د مسؤولينو ترمنځ د همغږۍ غونډه وشوه
د کندهار زون نظامي محکمې د حقوقي دېوان رئيس الحاج مولوي حمدالله (فیاض) او قضائي هیئت، د یاد ولایت له امنیه قوماندان الحاج طالب مولوي، د امنيتي حوزو او استخباراتو د مسؤولینو ترمنځ، په ۱۵/ ۱۰/ ۱۴۴۷هـ ق نېټه د همغږۍ غونډه وشوه.
یاده غونډه د سترې محکمې نظامي مرستیال محترم شیخ سردارمحمد (ابوالفیضان) صاحب د هدایت له مخې د عالیقدر امیرالمؤمنین (حفظهالله تعالی) د ۲۷ /۷ /۱۴۴۷هـ ق نېټې، ۱۷مې ګڼې فرمان "د غايبو اشخاصو، مفقودینو او ساعین بالفساد، د منقول او غیر منقولو ملکیتونو اړوند" د تطبیق په موخه جوړه شوې وه.
غونډه د قرآن عظیم الشان د څو مبارکو آیاتونو په تلاوت پیل شوه؛ ورپسې د کندهار ولایت د ښاري ابتدائيه محکمې رئیس محترم مفتي حزب الله د مجاهدینو ترمنځ د اتحاد او یووالي اړوند ارزښتناکه وینا وکړه.
د غونډې په دوام د کندهار زون نظامي محکمې د حقوقي دېوان رئيس د مسؤولینو د اطاعت، په بیت المآل کې د خیانت نه کولو او د مشرتابه (حفظهالله تعالی) د پورته فرمان د تطبیق په اړه ارزښتناکې خبرې وکړې.
د غونډې په وروستيو کې ګډونوالو د یاد فرمان د تطبیق په برخه کې د پوره همکارۍ ډاډ څرګند کړ.
غونډه په اختتامیه دعاء پای ته ورسېده.
