د کونړ د مرافعه محکمې رئیس د یاد ولایت د دريو ولسواليو له ابتدائيه محاکمو څخه ليدنه وکړه

په ۱۲/ ۱/ ۱۴۴۶ هـ ق نېټه د کونړ ولایت د مرافعه محکمې محترم رئیس الحاج مولوي عزیز الرحمن (حقاني)، د ښاري محکمې رئیس مولوي محمد ایوب (قلم) او مل پلاوي د چپې درې، ماڼوګي او وټه پور ولسوالیو له ابتدائيه محاکمو څخه لیدنه وکړه.
د ليدنې په پيل کې د چپې درې ولسوالۍ ابتدائیه محکمې رئيس الحاج مولوي شېر ولي، د ماڼوګي ولسوالۍ د ابتدائیه محکمې رئیس مولوي محب الله او د وټه پور ولسوالۍ د ابتدائيه محکمې رئیس مولوي روشن خان یاد پلاوي ته هرکلی او ښه راغلاست ووایه.
ورپسې د مرافعه محکمې رئیس د یادو ولسوالیو د قضائي او اداري اجراآتو د کتلو ترڅنګ په یو شمېر قضائي اجراآتو مفصلي خبرې وکړې او د یو شمېر اجراآتو په اړه د یادو محاکمو مسؤولينو ته لازمې لارښوونې وکړې.
د ليدنې په دوام د یادو محاکمو اړوند د حقوقو مدیریتونو څخه هم نظارت وشو، د اړونده مدیریتونو کارونه له نږدې وکتل شول او د شته نیمګړتياوو په اړه د ابتدائیه محاکمو له رئیسانو سره هر اړخیزې خبرې وشوې.
د مرافعه محکمې رئيس د یادو محاکمو مسؤولينو ته په خطاب کې وويل، چې زموږ دغه سفرونه د محاکمو په اجراآتو کې د شفافیت او د هېوادوالو ستونزو ته پر وخت د رسېدنې په معنی دي، په راتلونکې کې به هم د محاکمو د اجراآتو څخه د څارنې او د هېوادوالو د ستونزو د حل په موخه خپلو سفرونو ته دوام ورکوو، تر څو د محاکمو اجراآت په احسنه، شفافه او بې پرې توګه ترسره شي.
د لیدنې په پای کې د مرافعه محکمې رئيس د حاضرۍ په پابندۍ، پر خپل وخت قضایاوو ته پر رسېدنه، د مراجعینو سره په ښه سلوک او په اجراآتو کې پر شفافیت ټینګار وکړ.