د قضائیه قوې د محاکمو امنیتي او اجرائیوي چارو عمومي ریاست د اونیزو کړنو د ارزونې او د مسؤولینو ترمنځ د همغږۍ غونډه وشوه

د روان ۱۴۴۶ هـ ق کال د محرم الحرام میاشتې په ۴مه نېټه د قضائیه قوې د محاکمو امنیتي او اجرائیوي چارو عمومي ریاست د غونډو په تالار کې د یاد ریاست د رئیس محترم الحاج مولوي محمد عوض (سعید) په مشرۍ د مدیریتونو او آمریتونو د تېرې اوونۍ د فعالیتونو او لاسته راوړنو د ارزونې او د مسؤولینو ترمنځ د همغږۍ د لا ډېرې تقویې په موخه غونډه ترسره شوه.
غونډه کې د قضائیه قوې د محاکمو امنیتي او اجرائیوی چارو عمومي ریاست رئیس محترم الحاج مولوي محمد عوض (سعید)، د نظامي محاکمو د امنیتي او اجرائیوي قطعاتو عمومي قوماندانۍ سرپرست حافظ حکمت الله (آغا ذهین)، د تأمیناتو عمومي مدیر قاري فرید احمد (همت)، د پېژند عمومي مدیر مولوي نورمحمد (قتیبه)، د تفتیش او کنټرول عمومي مدیر مولوي عبدالرؤف (عمري)، د محاسبې عمومي مدیر مولوي محمد اسماعیل (ناظم) او ځینو نورو مسؤولینو او منسوبینو هم ګډون درلود.
غونډه د قرآنکریم د مبارکو آیاتونو په تلاوت پیل شوه؛ ورپسې د یاد عمومي ریاست رئیس د مدیریتونو او آمریتونو د ښه خدمت کولو ستاینه وکړه همدا راز یې د مسؤوليتونو د لا ښه ادا کولو لپاره مسؤولینو ته تفصیلي خبرې وکړې وویل، د مسؤولیتونو د ښه ترسره کولو لپاره لومړی شرط خپل مسؤولیت ته پابندي، د مسؤولینو ترمنځ اتفاق، همکاري او همغږي ده، که غواړئ مسؤولیتونه مو په آسانه او سالمه توګه ترسره کړئ، نو له الله (جل جلاله) څخه توفیق وغواړئ او خپل اتفاق او همغږي وساتئ، تر څو د مسؤولیت په ادا کې ستونزو ته یوازې نه اوسئ. 
یاده غونډه د دعوت او ارشاد عمومي مدیر مولوي عبدالباري لخوا د دعا په ویلو پای ته ورسېده.