د کابل د مرافعه محکمې عمومي رئيس د دغه ولایت له نظارت خانې څخه ليدنه وکړه

د روان ۱۴۴۵هـ ق کال د رجب المرجب مياشتې په ۸مه نېټه د کابل ولایت د مرافعه محکمې عمومي رئیس محترم مفتي ذبېح الله (ساجد) او د تحريراتو عمومي مدير عنایت الرحمن (ساپي) د کابل ولايت له عمومي نظارت خانې څخه لیدنه وکړه.
د مرافعه محکمې پلاوي د يادې ليدنې په پیل کې د کابل ولایت د نظارت خانې له مسؤولینو سره وکتل، ورپسې یې د نظارت لاندې مظنونین او متهمینو د وضعیت څېړلو په موخه د نظارت خانې څخه څارنه وکړه او د یادې نظارت خانې د ټولو اړوند نظارت لاندې اشخاصو بشپړ شهرت، کیفیت، نظریات او ستونزې یې له ځان سره یاداشت کړې.
د ليدنې په دوام د مرافعه محکمې عمومي رئیس محترم مفتي (ساجد) یاد اشخاصو ته ډاډ ورکړ، چې دوسیو ته به یې د اړوندو محاکمو لخوا په ټاکلي وخت د اسلامي شریعت د احکامو په رڼا کې رسېدنه کېږي.
محترم مفتي ساجد تر نظارت لاندې نارینه او ښځینه کسانو د ساتنې ځایونه او شته روغتون څخه له نږدې ليدنه وکړه او هغوی ته یې د اسانتیاوو برابرولو په موخه ځینې لارښوونې وکړې.
د يادونې وړ ده چې د نظارت خانې ټول تر نظارت لاندې کسان د اسلامي امارت له شفقت او د مسؤولینو له چلند څخه خوښ وو.