د کونړ د مرافعه محکمې رئیس د يادې محکمې د حقوقو له آمریت څخه ليدنه وکړه
د سه شنبې په ورځ ( ۴/ ۷ / ۱۴۴۵هـ ق نېټه) د کونړ ولایت د مرافعه محکمې رئیس محترم الحاج مولوي عزیز الرحمن (حقاني) د تحریراتو آمر شاه محمد (هلالزي) په ملتيا د مرافعه محکمې د حقوقو له آمریت څخه لیدنه وکړه.
د ليدنې په پيل کې د حقوقو آمر مولوي محمد علي (جوهري) د مرافعه محکمې رئیس ته هر کلی او ښه راغلاست ووایه او د نوموړي دا اقدام یې وستایه.
ورپسې د مرافعه محکمې رئیس د ياد آمریت له چارو ليدنه وکړه، په بېلا بېلو موضوعاتو یې خبرې وکړې، د حقوقو آمریت له ورځنیو چارو، د ياد آمريت د ضروریاتو په اړه یې تفصیلي معلومات وغوښتل او د مرافعه محکمې د رئیس له لوري ورته لازم هدایت وشول.
د ليدنې په دوام د مرافعه محکمې رئيس د مراجعینو ستونزو ته د رسېدنې په موخه هم هر اړخیزې خبرې وکړې، د حقوقو آمریت ټولو کارکوونکو ته يې له مراجعینو سره د احسن سلوک، حاضرۍ ته د پابندۍ، په اجراآتو کې د شفافیت او سرعت په اړه لازم هدایات ورکړل، تر څو کارونه په منظم، بې پرې توګه پر مخ ولاړ شي او د هېوادوالو ستونزې په خپل وخت حل شي.
د يادې ليدنې په پای کې د مرافعه محکمې رئیس له لوري د حقوقو آمریت منسوبینو ته د هر راز همکارۍ او لازمو اسانتیاوو د برابرولو ژمنه ورکړل شوه.
غونډه د مرافعه محکمې د رئیس په دعاء پای ته ورسېده.
