د کونړ د مرافعه محکمې رئیس د نرنګ له ابتدائيه محکمې څخه لیدنه وکړه
د دوشنبې په ورځ ( ۱۴۴۵ د محرم میاشتې په ۲۱مه نېټه) د کونړ ولایت د مرافعه محکمې رئیس محترم الحاج مولوي عزیز الرحمن «حقاني» د مرافعه محکمې د مدني دېوان د رئیس محترم مولوي عبدالمالک په ملتیا د نرنګ ولسوالۍ له ابتدائيه محکمې څخه لیدنه وکړه.
د نرنګ ولسوالۍ د ابتدائيه محکمې رئیس محترم مولوي فیضان الله یاد پلاوي ته هر کلی او ښه راغلاست ووایه.
د مرافعه محکمې دغه پلاوي د یادې ابتدائيه محکمې د اداري او قضائي اجراآتو د ارزونې تر څنګ د حاضرۍ کتاب هم بررسي کړ.
د مرافعه محکمې رئیس دغې ابتدائیه محکمې ته د چارو د چټکیا او هیوادوالو دوسیو ته پر وخت د رسېدو په موخه درې کسان خدمتي معرفي کړل او وویل، د سترې محکمې د عالي مقام د هدایت له مخې د بندیانو موضوعاتو ته لومړیتوب ورکړئ.
د مرافعه محکمې رئیس د نرنګ ولسوالۍ د ابتدائیه محکمې او په یاده ولسوالۍ کې د حقوقو مدیریت کارکوونکو ته په اجراآتو کې د سرعت تر څنګ د شفافیت هدایت وکړ.
محترم الحاج مولوي عزیز الرحمن «حقاني» د خپل سفر په دوام د نرنګ ولسوالۍ له ولسوال محترم مولوي محمدکریم «عمرصدیق»، د یادې ولسوالۍ د استخباراتو مدیر محترم سردار ولي « خادم » او نورو نظامي منسوبینو سره هم لیدنه وکړه او له یادو مسؤولینو یې ژمنه واخیسته کې له محکمې سره به د اړتیا پر مهال اصولي همکارۍ ته دوام ورکوي.