د سترې محکمې د نظامي محاکمو معاون د یوه پلاوي په مشرۍ (۴) ولایتونو ته سفر وکړ
د روان ۱۴۴۵ هـ ق کال د محرم الحرام میاشتې په ۶مه نېټه د سترې محکمې د نظامي محاکمو معاون محترم شیخ خیرجان خیرخواه صاحب د یوه پلاوي په مشرۍ چې په تشکیل کې یې د نظامي منسوبینو دېوان مفتي، محترم مفتي حیات الله صاحب، د نظامي منسوبینو دېوان محرر محترم مولوي عبدالباقي صاحب او محترم مولوي صفي الله (الهام صاحب) موجود وو، بلخ، بدخشان، کندوز او تخار ولایتونو ته سفر وکړ.
د سترې محکمې د دغه لوړ رتبه پلاوي د سفر عمده موخه په ولایتونو کې د نظامي محاکمو د څانګو جوړول و چې د یادو څانګو د جوړېدو په نتیجه کې به د زون د محاکمو او ولایتي محاکمو د څانګو ترمنځ همغږۍ لا تقویه او چارې به یې چټکې شي.
د سترې محکمې د نظامي محاکمو د مرستیال په مشرۍ دغه پلاوي د بدخشان د نظامي منسوبینو دېوان څخه څانګه جوړه کړه؛ دغه راز د بلخ ولایت د نظامي محکمې زون اړوند سرپل، جوزجان او فاریاب ولایتونو کې د نظامي محاکمو څانګې جوړې کړې، چې د منظورۍ وروسته به خپل کارونه روان کړي.
د سترې محکمې د نظامي محاکمو معاون محترم شیخ خیرجان خیرخواه صاحب او ورسره مل پلاوي د خپل سفر پر مهال د کندوز او بدخشان ولایتونو د والي صاحبانو په ګډون د نورو اړوند ولایتي ادارو له مسؤولینو سره هم وکتل، یادو ولایتي مسؤولینو د سترې محکمې له دغه لوړ رتبه پلاوي مننه وکړه چې د نظامي محاکمو د چارو د لابهبود او چټکتیا لپاره یې دغه ولایتونو ته سفر وکړ.
پر دې سربېره د سترې محکمې د یاد پلاوي غړو د بدخشان او بلخ ولایتونو د مرافعه محاکمو له رئیسانو او نورو قضائي غړو سره هم ولیدل، د دوی ستونزې او نظریات یې واورېدل او د محاکمو د چارو د لاښه والي په موخه یې د سترې محکمې د مسؤولینو د هر ډول توجه او ملاتړ ډاډ ورکړ.
د محترم شیخ خیرخواه صاحب په مشرۍ دغه پلاوی له خپل پنځه ورځني سفر وروسته د ۱۴۴۵ هـ ق کال د محرم میاشتې په ۱۰مه نېټه بېرته کابل ته راستون شو.
