د محاکمو د کاري وخت په هکله د عاليقدر امیرالمؤمنین حفظه الله حکم
د محاکمو د کاري وخت د تعیین په هکله د افغانستان اسلامي امارت د زعیم عالیقدر امیرالمؤمنین حفظه الله تعالی د ۲/۹/۱۴۴۳ هـ ق نېټې د ۴۹۴ج۱ شمېره ګڼې حکم کې راغلي: ((دا چې اوس ناسم شرایط پای ته رسېدلي او اسلامي امارت په ټول هیواد کې کاملا واکمن دی نو د افغانستان اسلامي امارت تمیزونه، مرافعه او ابتدائیه ټولې محکمې دې خپل کاري وخت په لاندې توګه تعین کړي:
د کال لومړۍ شپږ میاشتې [د حمل له لومړۍ نېټې څخه بیا د سنبلې تر پایه] د هرې شنبې څخه تر چهارشنبې د سهار ۸:۰۰ بجو څخه د ماپښین تر ۴:۰۰ بجو پورې. د ډوډۍ خوړلو او لمانځه ادا کولو لپاره د ۱۲:۰۰ بجو څخه تر ۱:۰۰ بجې پورې وقفه ده او هره پنجشنبه د سهار له ۸:۰۰ بجو څخه د ماپښین تر ۱:۰۰ بجې پورې پرته له وقفې.))
د یاد حکم په اساس، د روژې مبارکې په میاشت کې باید ټول محاکم د شنبې څخه تر پنجشنبې د سهار له ۸:۰۰ څخه د ماپښین تر ۱:۰۰ بجې پورې پرته له وقفې فعالیت ولري.
دغه راز د عالیقدر امیرالمؤمنین حفظه الله تعالی په حکم کې زیاته شوې: ((د کال په دوهمو شپږو میاشتو کې «د میزان له لومړۍ نېټې څخه د حوت تر پایه» د هرې شنبې څخه تر چهارشنبې پورې د سهار له ۸:۳۰ بجو څخه د مازیګر تر ۳:۳۰ بجو پورې، له ۱۲:۰۰ څخه تر ۱:۰۰ بجې پورې د ډوډۍ خوړلو وقفه ده او هره پنجشنبه د سهار له ۸:۳۰ څخه د ماپښین تر ۱:۳۰ بجې پورې پرته له وقفې.))
بناء د اسلامي امارت تمیزونو، دېوانونو، مرافعه او ابتدائیه ټولې محکمې دې د پورتنیو وختونو سره سم خپل کارونه تنظیم کړي او نور هغه مکتوبونه چې له دغه حکم سره ټکر لري لغوه دي.
