د پکتيا ولايت محاکمو د مسؤولينو په هڅو د دوو کورنيو ترمنځ د قتل شپږ کلنه دښمني پای ته ورسېده
د پکتيا ولايت د مرافعه محکمې عمومي رئيس محترم مفتي عبيدالله (خالد) او د ياد ولايت د ځاځي اريوب ولسوالۍ ابتدائيه محکمې رئيس مولوي نورالله (عرفان) په ډېرو هڅو، د قومي مشرانو او علماء کرامو په منځګړيتوب په ۱۷/ ۸/ ۱۴۴۶ هـ ق نېټه د دوو کورنيو ترمنځ د قتل شپږ کلنه دښمني حل او فصل شوه.
ياده موضوع شپږ کاله وړاندې په ځاځي اريوب ولسوالۍ کې د دوو کورنيو ترمنځ پېښه شوې وه؛ چې دښمني يې تر اوسه پاتې وه.
دغه موضوع محکمې ته تر راجع کېدو وروسته په غور وڅېړل شوه، د محاکمو مسؤولينو دواړه لوري سولې ته وهڅول او له روغې جوړې وروسته د محکمې په ابلاغ شوې پرېکړه يې قناعت وکړ او موضوع يې په رسمي توګه پای ته ورسېده.
د یادې پېښې دواړو لوریو د اړوند محاکمو له مسؤولینو څخه مننه وکړه چې د دوی ترمنځ څو کلنه دښمني يې په دوستۍ بدله کړه او په دې برخه کې یې نه ستړې کېدونکې هلې ځلې وکړې.
