د پکتیکا ولایت ارګون ولسوالۍ ابتدائیه محکمې د مسؤولینو لخوا د جبري نکاح مخه ونیول شوه
د پکتيکا ولايت ارګون ولسوالۍ ابتدائیه محکمې مسؤولینو په ۱۸/ ۷/ ۱۴۴۷ هـ ق نېټه په بدو کې د يوې نجلۍ د ورکولو او جبري نکاح مخنیوی وکړ.
په یاده موضوع کې (۱۲) کاله مخکې یوه نجلۍ چې هغه مهال یې عمر څلور کاله و، د بدو په بدل کې ورکړل شوې وه، موضوع ابتدائیه محکمې ته تر راجع کېدو وروسته په غور وڅېړل شوه.
وروسته له پوره غور او څېړنې ابتدائیه محکمې د نجلۍ په ګټه فیصله صادره کړه او د يوې جبري نکاح مخه يې ونيوله.
دغه راز د ابتدائیه محکمې مسؤولینو یاده فیصله په علني ډول په یوه غونډه کې ابلاغ کړه او د دعوې جانبینو ته یې وویل، هېڅوک نشي کولای ښځې په بدو کې ورکړي، یا هم د نارینهوو د ناسمو کړنو قرباني شي.
د محکمې مسؤولینو د ناستې ټولو ګډونوالو ته توصیه وکړه چې هر مؤمن مسلمان باید د ښځو او ماشومانو اسلامي او انساني کرامت ته درناوی ولري او د نکاح پر مهال باید د ښځو ټول شرعي حقونه مراعات کړي.
