د قضائي تفتیش عمومي ریاست مفتشینو د جوزجان ولایت له محاکمو او مرکزي زندان څخه لیدنه وکړه

د سترې محکمې عالي مقام په هدایت د قضائي پلټنې عمومي ریاست یوه مؤظف پلاوي د محترم مولوي فیض الرحمن (نثار) په مشرۍ؛ چې مولوي کمال الدین (متقي) او مولوي فتح محمد (فاتح) يې غړيتوب درلود، د روان 1447هـ ق کال د جمادی الآخرة میاشتې په 13 مه نېټه جوزجان ولایت ته د محاکمو د تېرو فعالیتونو د څېړنو په موخه سفر وکړ.
یاد پلاوي د ليدنې په پيل کې د مرافعه محکمې له رئیس سره وکتل، ورپسې يې د بندیانو د ستونزو د څېړلو په موخه د یاد ولایت له مرکزي زندان څخه لیدنه وکړه او د هغو بندیانو چې شکایتونه يې درلودل، شکایتونه يې له ځان سره ولیکل او بیا يې له اړونده محاکمو سره شریک کړل.
دغه پلاوي د خپل کاري پلان له مخې د یاد ولایت د (10) ولسوالیو له ابتدائیه محاکمو، د حقوقو مدیریتونو، د مرافعه او ښاري ابتدائیه محاکمو اړوند دېوانونو، وثایقو او حقوقو آمریتونو، مخزن، اختصاصي او نظامي محاکمو څخه جلا جلا لیدنه وکړه.
یاد پلاوي د پلټنې بهیر په جریان کې د دغه محاکمو د قضائي، اداري او مالي چارو هر اړخیزه پلټنه وکړه، د محاکمو د قضائي او اداري پرسونل د سلوکي او مسلکي اړخونو معلومات يې واخیستل او د چارو د سمون په برخه کې ورته لازمې لارښوونې وکړې.
 د ليدنې په دوام یاد پلاوي د محاکمو اړوند شته ستونزې، کاري خنډونه او نېمګړتیاوې له ځان سره یاداشت او په پای د ستونزو د حل، د خنډونو له منځه وړلو او د نېمګړتیاوو د اکمال په اړه د مرافعه محکمې له مقام سره تفاهمي ناسته وکړه او ټولې ستونزې يې په جلا جلا توګه ورسره شریکې کړې. 
دغه راز پلاوي د یاد ولایت او ولسوالیو له مسؤولینو سره ناستې وکړې او د محاکمو د فعالیتونو د لا ښه پرمختګ او د ځینو اړونده ستونزو د حل په اړه د هغوی نظرونه واورېدل.
د قضائي پلټنې پلاوي یاد سفر او ليدنه د 1447 هـ ق کال د جمادی الآخرة میاشتې په 26 مه نېټه پای ته ورسېد.