محترم مولوي عبدالمنان د پکتيکا د نظامي ابتدائيه محکمې د نوي رئيس په توګه معرفي شو

د پکتیکا ولايت د نظامي ابتدائیه محکمې نوی رئیس محترم مولوي عبدالمنان (محق) په ۱۲/ ۱/ ۱۴۴۶هـ ق نېټه د يوې غونډې په ترڅ کې د يادې محکمې کارکوونکو او ولایتي ادارو نورو مسؤولینو ته ور وپېژندل شو.
 په دې موخه جوړه شوې غونډه کې د مرافعه محکمې عمومي رئیس محترم مولوي خلیفه محبوب الرحمن (نقشبندي)، د پکتیا زون نظامي محکمې عمومي رئیس محترم مولوي عبدالهادي (همت)، د پکتیکا ولایت والي، د استخباراتو رئیس، د علماوو شورا رئیس، د امنیه قوماندانۍ استازي او د نورو ادارو مسؤولینو ګډون کړی و.
غونډه د مرافعه محکمې د عامه امنیت دېوان د رئیس مولوي عبدالله (عمري) لخوا په تلاوت پيل شوه؛ ورپسې د مرافعه محکمې رئیس وینا وکړه وويل، مسؤولیت ته باید د غنیمت په سترګه ونه کتل شي او نه ورته غنیمت وویل شي، هر مسؤول باید په پوره ډاډ، صداقت او امانتدارۍ خپل ور سپارل شوی مسؤولیت ترسره کړي، همداراز نوموړي د عالیقدر امیرالمؤمنین (حفظه الله تعالی) د فرامینو په عملي کولو ټینګار وکړ.
د غونډې په وروستيو کې د نظامي ابتدائیه محکمې نوي رئیس محترم مولوي عبدالمنان (محق) وینا وکړه وويل، اسلامي نظام د شهیدانو په وینو او زیاتو قربانیو راغلی دی، زموږ قرباني او تکلیفونه هم د اسلامي شریعت مطهره د حاکم کېدو په هدف وو، نو په موږ ټولو لازمه ده چې د اسلامي نظام د بقا لپاره په صداقت او اخلاص سره کار وکړو.
غونډه د علماوو شورا د رئیس محترم شیخ عبدالقدوس (عظیمي) په دعا ويلو پای ته ورسېده.