د پکتیا زون نظامي محکمې مسؤولینو په هڅو د قتل موضوع حل او فصل شوه

د پکتیا زون نظامي محکمې رئیس شیخ عبدالجلیل آغا (حسیني) او قضائي غړو په ډېرو هڅو او ترغیب، د قومي مشرانو، سپین‌ږیرو او مصلحینو په منځګړیتوب، د عمدي قتل موضوع، په ۸/ ۱۱/ ۱۴۴۷هـ ق نېټه حل او فصل شوه.
یاده موضوع د لوګر ولایت برکي برک ولسوالۍ په «لعلک‌خېلو» کلي کې رامنځته شوې وه او یو ملکي کس په کې وژل شوی و.
دغه موضوع د پکتیا زون نظامي محکمې ته تر راجع کېدو وروسته په غور او دقت وڅېړل شوه، ورپسې د یادې موضوع په اړه د پکتیا زون نظامي محکمې قضائي هیئت له خوا جانبینو ته د سولې ترغیب وشو، چې په پایله کې جانبین سولې ته اماده شول.
د مقتول کورنۍ تر رضایت وروسته د یوې غونډې په ترڅ کې چې قومي مشرانو، سپین‌ږیرو او مصلحینو هم په کې ګډون درلود، یاده موضوع حل او فصل شوه.
 د یادونې وړ ده، چې د مقتول وارثینو ته څه اندازه پیسې ورکړل شوې او په دې سره د عمدي قتل موضوع حل او رسمًا يې دښمني پای ته ورسېده.