د پکتيا ولايت د ښاري ابتدائيه محکمې رئيس په مشرۍ اداري ناسته وشوه

د پکتيا ولايت د ښاري ابتدائيه محکمې رئيس محترم مولوي محمد رحيم (نعماني) په مشرۍ د یادې محکمې د دېوانونو رئيس صاحبانو، مفتيانو، محررينو او اداري کارکوونکو په ګډون په ۱/۵/۱۴۴۶هـ ق نېټه اداري ناسته وشوه.
غونډه د قرآنکریم د مبارکو آیاتونو په تلاوت پیل شوه؛ وروسته د یادې محکمې رئيس قضائي او اداري مسؤولينو ته يو لړ اړينې سپارښتنې وکړې وويل، د تېر په څېر د مراجعينو کارونو ته د ښې رسېدنې په پار ټول خپلو مسؤولیتونو ته پوره پاملرنه وکړئ، د آمر اطاعت او د وخت قدر وکړئ، مسؤوليت درک کړئ او دندې ته په ټاکلي وخت حاضرېږئ.
نوموړي زیاته کړه، د اصولنامې سره سم باید په اونۍ کې یو ځل د بندیانو نظارت وشي، د اداري چارو د تېروتنو د مخنیوي په موخه باید وخت پر وخت د اداري کارکوونکو کړنې وڅارل شي.
غونډه د دعا په ويلو پای ته ورسېده.