د کونړ ولایت د مرافعه محکمې رئیس د څوکۍ ولسوالۍ ابتدائیه محکمې ته سفر وکړ
د روان ۱۴۴۴ هجري قمري کال د رمضان میاشتې په ۱۵مه نېټه د کونړ ولایت د مرافعه محکمې رئیس محترم مولوي عزیز الرحمن (حقاني) او ورسره مل پلاوي د یاد ولایت د څوکۍ ولسوالۍ له ابتدائیه محکمې څخه لیدنه وکړه.
د مرافعه محکمې رئیس د دغه سفر پر مهال د څوکۍ ولسوالۍ قضائي او اداري اجراآت له نږدې وکتل؛ وروسته یې په مربوطه محکمه کې د شته ځينو اړینو مواردو په اړه د ابتدائیه محکمې له رئیس محترم مولوي محمد مسلم سره هر اړخیزې خبرې وکړې .
د استیناف محکمې رئیس څرګنده کړه چې زمونږ دغه سفرونه د محاکمو په اجراآتو کې د شفافیت او د هېوادوالو ستونزو ته په ټاکلي وخت د رسېدنې سبب کېږي او ان شاءالله په راتلونکي کې به هم د محاکمو د اجراآتو څخه د څارنې او د مشکلاتو د حل او د هېوادوالو د ستونزو د اورېدو او حل په موخه خپلو سفرونو ته ادامه ورکوو؛ تر څو د محاکمو اجراآت په احسنه، شفافه او بې پرې توګه ترسره شي.
د استیناف محکمې رئیس د یاد سفر په جریان کې د څوکۍ ابتدائیه محکمې د چت د ایزوګام او نورې ساختماني چارې چې په ۱۴۰۱ هـ ش کال کې د یادې محکمې د غوښتنې په اساس ترسره شوې وې له نږدې وکتلې.
د یادې ابتدائیه محکمې رئیس ډاډ ورکړ چې خپلې ټولې چارې به د شرعي اصولو مطابق په ټاکلي وخت او شفافه توګه ترسره کوي.
په پای کې د مرافعه محکمې رئیس حاضرۍ ته په پابندۍ، پر ټاکلي وخت قضایاو ته پر رسېدنه، له مراجعینو سره په ښه سلوک او په اجراآتو کې پر شفافیت ټینګار وکړ .
