د پکتیا ولایت د استیناف محکمې رئیس د دغه ولایت اړوند محاکمو له قضاتو سره وکتل
د ۱۴۴۴ هـ ق کال د درېیمې میاشتې په ۱۵مه نېټه د پکتیا ولایت د مرافعه محکمې عمومي رئیس الحاج مفتي عبیدالله (خالد) د دغه ولایت د ولسوالیو د ابتدائیه محاکمو له قضاتو (رئیسانو) سره میاشتنۍ غونډه ترسره کړه.
غونډه د پکتیا ولایت د میرزکي ولسوالۍ د ابتدائیه محکمې د رئیس مولوي عصمت الله (معتصم) لخوا د قرآن کریم د مبارکو آیاتونو په تلاوت پیل شوه.
ورپسې د پکتیا ولایت د مرافعه محکمې عمومي رئيس د غونډې ګډونوالو ته ښه راغلاست ووایه او زیاته یې کړه، خوشحاله یم چې له محترمو قضاتو سره په دې ناسته کې پر مهمو اړوند موضوعاتو خبرې کوم.
د استیناف محکمې رئیس په یاده غونډه کې د جزائي او حقوقي دوسیو د ځنډ، د صورت دعوی پر اصولو، د قضائي او شرعي کتابونو پر بناء د فیصلې په کولو، د مصلحینو او شاهدانو د مواصفاتو، د مرافعه طلبۍ د وخت او په اونۍ کې یو ځل د محبوسینو د لیدنې په هکله درنو قضاتو ته تفصیلي خبرې وکړې.
همدارنګه د مختلف النوع وثایقو لکه وکالت خط بالاقرار، وکالت خط بالشهود، حصر وراثت، وصایت خط او نورو ګڼو وثایقو په هکله یې د رهنماء وثایق سره سم دوه ساعته سیمینار وړاندې او یادو قضاتو ته یې د دغه موضوعات په تړاو مهمې سپارښتنې وکړې.
په غونډه کې د نورو قضاتو په استازیتوب د پکتیا ولایت د زرمت ولسوالۍ د ابتدائیه محکمې رئیس مولوي محمدآجان (رهبر) خبرې وکړې او د مرافعه محکمې له رئیس څخه یې مننه وکړه.
غونډه د دعاء په وېیلو سره پای ته ورسېده.
