د پکتیا د مرافعه محکمې رئیس د یوه پلاوي په مشرۍ د شواک، ګردې څېړۍ او وزي ځدراڼ ابتدائیه محاکمو څخه لیدنه وکړه
د روان ۱۴۴۴هـ ق کال د شوال المکرم میاشتې په ۹مه نېټه د پکتیاولایت د مرافعه محکمې رئيس محترم مفتي امان الله (منقاد حقاني)، د جزاء دېوان د عضو محرر محترم مولوي عبدالرحمن (زاهد)، د مدني دېوان د عضو محرر محترم مولوي محمداسلم (هدایت) او د تحریراتو آمر قاري میرزامحمد(رشیدي) په ملتیاد شواک، ګردې څېړۍ او وزي ځدراڼ ولسوالیو له ابتدئيه محاکمو څخه جلا، جلا لیدنه وکړه.
په یاده لیدنه کې د پکتیا ولایت د مرافعه محکمې عمومي رئيس د یادو ولسوالیو د ابتدائيه محاکمو پر قضاتو سربېره له ولسوال صاحبانو، امنیه قوماندانانو، د امر بالمعروف مدیرانو او نورو اړوند مسؤولینو سره وکتل.
په دې لیدنه کې د پکتیا ولایت د مرافعه محکمې رئيس محترم مفتي امان الله (منقاد حقاني) د محاکمو مسؤولینو او کارکوونکو ته په خپله وینا کې وویل، د خلکو ستونزو ته پر وخت سره رسېدنه وکړئ، د ادارو ترمنځ همغږي وساتئ او د اسلامي امارت نظام ته وفاداره اوسئ.
وروسته یې د یادو ولسوالیو محترمو رئیس صاحبانو، مفتیانو او محرر صاحبانو سره ځانګړې ناسته ترسره کړه، د هغوی قضائي اواداري اجراآت یې له نږدې وکتل،
د لیدنې په جریان کې د مرافعه محکمې محترم رئيس صاحب د حاضرۍ، د متحدالمآل مکتوبونو، د مفتي فتوا ورکولو او نورواړینو موضوعاتو په اړه مفصلې خبرې وکړې او هغوی ته یې د قضائي او اداري چارو د لابهبود توصیه ورته وکړه.
ورپسې د مرافعه محکمې پلاوي د جزائي، حقوقي، مختلف النوع وثایقو او نورو اداري کارونو په اړه ورته لازمې لارښوونې وکړې.
د یادونې وړ ده چې د یادو ولسوالیو د ابتدائیه محاکمو محترمو قاضي صاحبانو د مرافعه محکمې د رئيس او ورسره مل پلاوي څخه مـنـنه وکړه د ابتدائیه محاکمو ته د دوی سفر یې د چارو د بهبود په موخه ډېر ګټور وباله.
