د پکتیا د مرافعه محکمې رئیس د دغه ولایت له ځینو قضاتو سره وکتل
د پکتیا ولایت د مرافعه محکمې عمومي رئیس الحاج مفتي عبیدالله (خالد) د ۱۴۴۴ هـ ق کال د شپږمې میاشتې په ۲۲مه نېټه د مرافعه او ښاري ابتدائیه محاکمو له قضاتو سره په خپل کاري دفتر ناسته وکړه.
غونډه د مرافعه محکمې د جزاء دېوان د محرر مولوي عبدالرحمن (زاهد) لخوا د قرانکریم د مبارکو آیاتونو په تلاوت پیل شوه.
ورپسې د پکتیا ولایت د مرافعه محکمې عمومي رئیس الحاج مفتي عبیدالله (خالد) د غونډې ټولو ګډونوالو ته ښه راغلاست ووایه او ټولو قضاتو ته یې د نفس او خواهشاتو د کنټرول په هکله د قرآنکریم او احادیثو په رڼا کې وینا وکړه.
د استیناف محکمې رئیس وویل، د ټولو محاکمو چارې باید په شفاف او عادلانه ډول ترسره شي.
دغه راز یې له کبر او کینې څخه پر ځان ساتلو، په محاکمو کې د فرېبکارو اشخاصو پر مخنیوي، نظام ته په وفادارۍ، په هره فیصله کې لوی الله (جل جلاله) حاضر او ناظر ګڼلو، وخت ته په پابندۍ او ځینو نورو مهمو مواردو ټینګار وکړ.
د غونډې په دوام د نورو قضاتو په استازیتوب د مرافعه محکمې د ثبت اسناد وثایق او مخزن آمریت مفتي شیخ عبدالجبار (احمدي) خبرې وکړې، د پکتیا ولایت د مرافعه محکمې له رئيس څخه یې د زړه له تله مننه وکړه.
غوڼده د دعاء په ویلو سره پای ته ورسېده.
