د پکتیا د مرافعه محکمې رئیس او ورسره مل پلاوي د زرمت او روحاني بابا له ابتدائیه محاکمو لیدنه وکړه
د روان ۱۴۴۴هـ ق کال د شوال المکرم میاشتې په ۱۱مه نېټه د پکتیاولایت د مرافعه محکمې رئیس محترم مفتي امان الله (منقاد حقاني) او ورسره مل پلاوي هر یوه مولوي عبدالرحمن (زاهد) د جزا دېوان عضو محرر، مولوي حمدالله (حمیدي) د امنیت عامه دېوان عضو مفتي او قاري میرزامحمد (رشیدي) د تحریراتو آمر د زرمت او روحاني بابا ولسوالیو له ابتدائیه محاکمو څخه جلا، جلا لیدنه وکړه.
په دغه لیدنه کې د پکتیا ولایت د مرافعه محکمې عمومي رئیس د یادو ولسوالیو د ابتدائیه محاکمو پر قضاتو سربېره له ولسوال صاحبانو، امنیه قوماندانانو، د امربالمعروف مدیرانو او نورو اړوند مسؤولینو سره وکتل.
وروسته یې د یادو ولسوالیو د ابتدائیه محاکمو محترمو رئیس صاحبانو، مفتیانو او محرر صاحبانو سره ځانګړې ناستې ترسره کړې، د هغوی قضائي او اداري اجراآت یې له نږدې وکتل.
د لیدنې په جریان کې د مرافعه محکمې رئيس دحاضرۍ، د متحدالمآل مکتوبونو، د مفتي فتوا ورکولو او نورو اړینو موضوعاتو په اړه مفصلې خبرې وکړې، د قضائي او اداري امورو د لابهبود توصیه یې ورته وکړه.
ورپسې د مرافعه محکمې پلاوي په جزائي، حقوقي، مختلف النوع وثایقو او نورو اداري کارونو په اړه ورته لازمې لارښوونې وکړې.
دیادونې وړ ده چې د یادو ولسوالیو د ابتدائيه محاکمو محترمو قاضي صاحبانو د مرافعه محکمې د رئيس او ورسره مل پلاوي څخه مـنـنه وکړه او ابتدائیه محاکمو ته د دوی سفر یې د چارو د بهبود په موخه ډېرګټور وباله.
