د لوګر د ښاري ابتدائیه محکمې اداري ناسته ترسره شوه 

د روان ۱۴۴۵ هـ ق کال د ربيع الثاني مياشتې په ۲۲مه نېټه د لوګر ولايت د ښاري محکمې د عمومي رئيس محترم مفتي امان الله (منقاد حقاني) په مشرۍ اداري غونډه ترسره شوه.
یاده غونډه چې د دې محکمې د دېوانونو رئیسانو، مفتیانو، محررینو او مسلکي غړو په کې ګډون درلود، د قرآنکریم د څو مبارکو آیاتونو په تلاوت سره پیل شوه، ورپسې د جزا دېوان رئیس مولوي جان محمد (رائد) د ګډونوالو تعرف او پېژندنه وکړه.
دغه راز د لوګر د ښاري محکمې عمومي رئیس د غونډې ګډونوالو ته ښه راغلاست ووایه، د غونډې اجنډا او موخه یې واضح کړه.
نوموړي د غونډې ګډونوالو ته سپارښتنه وکړه چې خپلو کارونو ته پر وخت رسېدنه کوئ، د مراجعینو سره ښه او مناسب سلوک کوئ او کارونه مو په ټاکلي وخت ترسره کړئ.
د لوګر د ښاري محکمې عمومي رئيس وويل، الحمدلله چې اوس موږ د یو سپېڅلي نظام خاوندان یو، په ځانګړې توګه موږ په یوه داسې مهمه برخه کې مسؤولیت لرو چې د اسلامي نظام اصل بلل کېږي، نو زموږ لپاره داسې کړنې پکار دي چې د نورو لپاره مصدر د خدمت وګرځو، له قاضي څخه نیولې تر مامور پورې بايد ټول په سنت طریقه برابر یو او په را سپارل شوي مسؤولیت کې اخلاص، عدالت او اطاعت ته جدي پاملرنه وکړو.
د غونډې په دوام د دېوانونو رئیسانو هر يوه د یادو ذکر شويو موضوعاتو په اړه خبرې وکړې، خپلې مشورې يې د ښاري محکمې له عمومي رئیس سره شریکې کړې او ډاډ یې ورکړ چې خپل کارونه به په اصولي ډول په ټاکلي وخت ترسره کوي.
 د غونډې په پای کې د لوګر ولايت د ښاري محکمې عمومي رئیس له ټولو ګډونوالو مننه وکړه او د دوی د ښه خدمت ستاینه يې وکړه.
ياده غونډه د دعاء په ویلو پای ته ورسېده.