د سترې محکمې د جنوب لويدېځ زون قضائي مرستیال زابل ولايت ته سفر وکړ
د سترې محکمې د جنوب لويدېځ زون قضائي مرستیال محترم شیخ نورالله (منیر) صاحب؛ په ۱۴۴۷/۱۱/۴ هـ ق د خپلو کاري سفرونو په لړ کې زابل ولایت ته یو ورځنی سفر وکړ.
د ليدنې په پیل کې قضائي مرستيال د زابل ولایت مرافعه محکمې له رئیس محترم مفتي عبدالجلیل (سفیان)، د ښاري ابتدائیه محکمې له رئیس مولوي موسی کلیم (برهاني)، قضائي غړو او اداري کارکوونکو سره غونډه وکړه.
غونډه د قرآنکریم د څو مبارکو آیاتونو په تلاوت پیل شوه؛ ورپسې محترم قضائي مرستیال د ګډونوالو د حال پوښتنه وکړه او د محاکمو د کاري وضعیت، ستونزو او لاسته راوړنو په اړه یې معلومات ترلاسه کړل.
نوموړي ګډونوالو ته وینا وکړه او ټینګار یې وکړ، چې قضاء د پیغمبرانو سپېڅلی مسلک دی او د امانت په توګه ورپاتې ده، ټولې فیصلې باید د حق او عدالت پر بنسټ ترسره شي، په قضائي چارو کې باید له هر ډول شخصي تمایل او طرفدارۍ څخه ډډه وشي او پرېکړې یوازې د شریعت او نافذه اصولو مطابق ترسره شي.
دغه راز قضائي مرستيال څرګنده کړه، چې محاکم د عدالت د تامین بنسټیز ارګانونه دي، نو اړینه ده چې کارونه په منظم ډول تنظیم او پر وخت ترسره شي، څو د خلکو ستونزې پر وخت حل او عریضې يې له ځنډ پرته وڅېړل شي.
محترم شيخ نورالله منیر صاحب د خلکو غوښتنې او ستونزې واورېدې او زیاته يې کړه چې جنوب لويدېځ زون ټولو اړونده ولایتونو ته به سفرونه ترسره کړو او د محاکمو چارې به له نږدې وڅارو.
د مرافعه محکمې رئیس د ټولو په استازیتوب خبرې وکړې، د قضائي مرستیال صاحب له راتګ څخه یې مننه وکړه او ډاډ یې ورکړ چې د مشرتابه د لارښوونو په رڼا کې قضائي چارې په ښه ډول مخته روانې دي.
د لیدنو په دوام قضائي مرستيال د یاد ولایت له والي محترم الحاج شېرمحمد (شریف) سره لیدنه وکړه؛ والي صاحب د نوموړي له سفر څخه خوښي څرګنده کړه وویل، د محاکمو له فعالیتونو څخه ډېر خوشحال يو، د محاکمو، ولایت مقام، قوماندانۍ او نورو امارتي ادارو ترمنځ همغږي د ولس د ستونزو د حل لپاره اړینه ده.
لیدنه د دعاء په ویلو پای ته ورسېده.
