د سترې محکمې د جزا دېوان عمومي رئیس د هیواد پنځو ولایتونو ته سفر وکړ
د افغانستان اسلامي امارت د سترې محکمې د جزا دېوان عمومي رئیس محترم مفتي عتیق الله (دروېش) ولایتونو ته د رسمي سفرونو په دوام د روان ۱۴۴۴ هـ ق کال د شوال میاشتې په ۴مه نېټه، له نږدې څخه د زندانونو د لیدنې او د یو شمېر مهمو دوسیو د څېړنې لپاره د هیواد پنځو ولایتونو (بدخشان، تخار، کندوز، بغلان او سمنګان) ته سفر وکړ.
د سترې محکمې د جزا دېوان عمومي رئیس د دغه (۱۳) ورځني سفر په ترڅ کې د یادو ولایتونو د مرافعه محاکمو پر رئیسانو سربېره د محاکمو له یو شمېر نورو قضائي کارکوونکو سره وکتل، هغوی ته یې په ټاکلي وخت د دوسیو د حل او فصل په اړه ټینګار وکړ.
دغه راز محترم مفتي عتیق الله (دروېش) د یاد هر ولایت په زندانونو کې له نږدې څخه د موجوده بندیانو د وضعیت او احوال پوښتنه وکړه، د هغوی ستونزې او نظرونه یې واورېدل.
پر دې سربېره د سترې محکمې د جزا دېوان عمومي رئیس د خپل سفر په جریان کې د یادو ولایتونو اړوند (۱۰) مهمې جزائي دوسیې هم له نږدې وڅېړلې.
د یادونې وړ ده چې د سترې محکمې د جزا دېوان عمومي رئیس محترم مفتي عتیق الله (دروېش) له لاسته راوړنو د دغه ډک رسمي سفر تر پای ته رسېدو وروسته په (۱۷/۱۰/۱۴۴۴ هـ ق) نېټه بېرته کابل ته راستون شو.
