د سترې محکمې د اداري معاون په مشرۍ د چارو د چټکتیا په موخه ناسته ترسره شوه
نن سه شنبه (۱۴۴۴/۵/۱۲هـ ق) نېټه د سترې محکمې د اداري معاون محترم شیخ عبدالمالک (حقاني) صاحب په مشرۍ د چارو د لا ښه تنظیم او مدیریت او په چارو کې د شفافیت رامنځته کولو په موخه اداري ناسته ترسره شوه.
په دې ناسته کې چې د سترې محکمې د اداري معاونیت په دفتر کې جوړه شوې وه، د سترې محکمې د مقام د دفتر رئیس، د بشري سرچینو عمومي رئیس، د مالي او اداري چارو عمومي رئیس، د استخدام رئیس، د اداري چارو رئیس، د بهرنیو، عامه اړیکو او مطبوعاتو سرپرست رئیس، د مالي او حسابي چارو رئیس او نورو اړوند مسؤولینو ګډون درلود.
یاده اداري ناسته د سترې محکمې د اداري معاون محترم شیخ عبدالمالک (حقاني) حفظه الله په تفصیلي خبرو پیل شوه.
د سترې محکمې اداري معاون محترم شیخ عبدالمالک (حقاني) صاحب د اداري چارو د ارزښت او اهمیت په اړه د خپلو خبرو په جریان کې وویل، د یوه ارګان یا ادارې د بریالتوب لپاره په ښه او مناسب ډول د اداري چارو ترسره کېدل لازمي او ضروري دي.
محترم حقاني صاحب د سترې محکمې د مسؤولینو او منسوبینو ترمنځ پر همکارۍ ټینګار وکړ.
ورپسې د ناستې ګډونوالو د غونډې په اجنډاء کې د شاملو موضوعاتو په اړه خپل نظرونه او وړاندیزونه شریک کړل.
یاده اداري ناسته د دعاء په ویلو سره پای ته ورسېده.
