د زابل ولایت د مرافعه محکمې رئیس د میزانې ولسوالۍ له ابتدائیه محکمې څخه لیدنه وکړه
د روان ۱۴۴۴ هـ ش کال د ربیع الثاني میاشتې په لمړۍ نېټه د زابل ولایت د مرافعه محکمې رئیس شیخ نقیب الله اخندزاده او ورسره مل پلاوي د مرافعه محکمې د امنیت عامه دېوان محرر مولوي عبدالنافع فیضان او د یاد ریاست د تحریراتو آمر حکمت الله (عاصم) ملتیا کوله، د میزانې ولسوالۍ له ابتدائیه محکمې څخه لیدنه وکړه .
په دې لیدنه کې د میزانې ولسوالۍ ابتدائیه محکمې قضائي او اداري چارې له نږدې وکتل شوې، د یادې لیدنې په نتیجه کې د نوموړې ابتدائیه محکمې کارکوونکو څخه مننه وشوه چې اداري او قضائي چارې یې ښې روانې دي.
د یادې محکمې مسؤولینو ته په ټاکلي وخت قضیو ته په رسېدنې او نه ځنډ باندې ټینګار وشوترڅو د طرفینو د شکایاتو، لګښتونو او ستړیاوو مخنیوی وشي.
په عموم کې د فیصلو د نواقصو د مخنیوي لپاره ورته داسې هدایت وشو چې کله موضوع پای ته ورسېده نو باید مفتي مسوده ترتیب کړي او دوهم ځل یې قاضي صاحب دقیق تر نظر وباسي او په درېیم قدم کې به محرر صاحب فیصله ولیکي.
پر دې سربېره محترم شیخ نقیب الله اخندزاده د صادره او وارده چارو د لابهبود په موخه هم د یادې محکمې مسؤولینو ته ځينې سپارښتنې وکړې.
د لیدنې په پای کې د مرافعه محکمې محترم رئیس د میزانې ولسوالۍ ابتدائیه محکمې کارکوونکو ته هدایت وکړ چې د مراجعینو کارونه پر وخت ورخلاصوئ، په دې سره به له یوې خوا د مراجعینو د شکایاتو مخه نیول شوې وي او له بلې خوا به الله (جل جلاله) او اسلامي امارت ته مسؤول نه یاست .
